اقضوا يومين معي | عنايتي بصحتي النفسيه

يومين من حياتي اعتنيت فيهم بصحتي النفسيه. روتيني اول ما اصحى من النوم، هواية التلوين، امر كان موترني ، كيف اخطط لمهام الاسبوع، سويت كيكه الساعه ٢ الصباح، قصتي مع الرضا بالقدر

الساعه ١ الظهر

انا من الناس عندي عاده من سنين ما احب أتكلم اول ما اصحى، كنت قبل اتسأل ليش بس الحين احس حبيتها واستغليتها كافرصه اني اصحى بهدوء بدون ما اضطر اتكلم مع احد واعكر مزاجي خاصه ان الساعات الأولى من استيقاظنا تحدد يومنا كامل. لاحظت فرق إيجابي في نفسي لما اسوي هذا الروتين. اول ما اصحى ابداء وقتي مع الله اصلي اقراء قران بعدها اسوي تمارين التنفس مع تمارين التمدد بعد الاستيقاظ من النوم، بعدها ابداء اجهز لليوم اسوي روتين العنايه الشخصيه النهاري، لما نعتني بجسمنا وشكلنا الخارجي هذا ينعكس على انفسنا من جواء وحتى يحسن مزاجنا طوال اليوم

الساعه ٥ العصر

بما ان هذا الأسبوع عندي مهمه شوي صعبه ويبغالها تركيز كبير جالسه احس بتوتر لكن بسيط الحمدلله ، لاني حاليا قادره اتحكم باعصابي واخفف من حدة التوتر. في كم شغله ساعدتني بهذا الامر، أولا في معلومه تعلمتها من كتاب السيطره على العواطف الي هي ما اعطي الأفكار السلبيه فرصه انها تتشعب وتسيطر علي. يعني كنت لما احس بافكار سلبيه عن المهمه ما اندمج معها واغير الموضوع على طول، ثانيا حاطه ببالي الامر رح يتم باذن الله لو مهما طول الوقت ، ثالثا اقسم المهام على أجزاء صغيره وبسيطه، رابعا اشجع نفسي على كل انجاز اسويه.

الساعه ٧ المساء

التخطيط الاسبوعي

هذي من الأشياء الي ساعدتني ارتاح نفسيا اني اعرف هذا الأسبوع ايش عندي مهام اجلس اخطط من بداية الأسبوع ايش ابغى اسوي . قبل كنت اخطط يوم بيوم وكنت اتوتر كثير بس التخطيط الأسبوعي افضل احس عندي اريحيه وانا اسوي كل مهمه، أحيانا احب اكتب بيدي اسرع واحيانا اكتبها بالنوته اذا ماعندي وقت. اجمل شعور بنهاية الأسبوع احط علامة صح يعطي شعور الفخر والانجاز

الساعه ٩ المساء

التلوين

من بين فتره وفتره احب اجلس الون وله فوائد عظيمه للصحه النفسيه والعقليه من ضمن هذي الفوائد.انه يريح العقل ويحسن وظائف المخ، يزيد من التركيز ، يخفف التوتر، يزيد من الحس الإبداعي، يساعد انه يخفف من المشاعر السلبية والاكتئاب. بداءة هذا الامر من سنتين بدون قصد اشتريت دفتر تلوين للأطفال باقل سعر وحسيت اني مرتاحه نفسيا بعد ما خلصت وقتها عجبني الموضوع فصرت يوميا الون  

الساعة ١١ المساء

ضروري اجلس اتأمل وأفكر يعني ما اعرف اجلس في الحياه الواقعيه كثير لازم افصل واجلس لحالي اريح نفسي من متاعب الحياه وازعاج الناس. أحب أعيش الحياة الي اتمناها ببالي برسمي وتفاصيلي الخاصه مثل ما انا ابغى، غالبا أحب اوصف شخصيتي بالخيال باني مبسوطة مبتسمه سعيدة عايشه الحياة والروتين الي ببالي راضيه عن كل جزء بحياتي. إحساس الاطمئنان ان الحياة تكون سهله وبسيطة ومريحه، إحساس الأمان الي اعطيه لنفسي بمساحتي الخاصة احلم وأفكر واتخيل واندمج بعالمي الجميل

الساعه ٢ الصباح

فجأة خطر ببالي اني اسوي كيك هذا الوقت عادي جدا من لما تلخبط نومي احس اني انجز ما شاء الله اكثر من قبل بكثير ونفسيا احس افضل الحمدالله يارب، مع اني ماني من محبين النوم متأخر بس هذا واقعي ولازم اتعايش معه . ما اضغط على نفسيتي اذا ما قدرت اسوي شيء نفسي فيه ، لا عادي اخذها بكل ارياحيه وصبر. من الأشياء الي تعلمتها بحياتي اني احن على نفسي وما اضغط عليها عشان أرضي الانا عندي خاصه اني شخص حساس وفي تصرفات تزيد من سوء نفسيتي ومزاجيتي، عشان كذا مافي شيء مستاهل في هذي الدنيا ازعل نفسي عشانه

الساعه ٥ الفجر

هذا القمر وقت الفجر

احب مثل ما ابداء يومي انتهي فيه اقضي وقتي مع الله صلاه ، قراءة قران اذكار الصباح واذكار قبل النوم . أيضا العنايه الشخصيه قبل النوم تعتبر من الأشياء المفيده للصحه النفسيه . صح أحيانا يكون نفسك تروحين تنامين على طول من التعب بس بعدين تحسين بتإنيب الضمير اذا ماسويتي الروتين اليومي. بس هذا التعب يستاهل لما تشوفين النتيجه بعد فتره

اليوم الثاني /يوم الأجازة

الساعه ٧ المغرب

اليوم لما حبيت اطلع من بعد أسبوع حبسه في البيت مطرت سبحان الله واضح اني شخص مرزوق ماشاء الله. انا من الناس ما احب اطلع في المطر لان زمان لما كنت صغيره كنت احب العب في المطر بعدها امرض على طول فا من يومها صرت أخاف اطلع بالمطر . احب اكتفي اني اراقبه من بعيد واحب اجوائه تكون جميله بس أخاف من صوت البرق خاصه اليوم صوته مره مخيف سبحان الله. ربي يجعلها امطار خير و بركه

الساعه ٩ المساء

هذي اول مره اشرب قهوة بارده لذيذة من بعد قهوتي

. على أي حال حابه أكتب عن تجربتي عن الرضا في القدر. انا كنت ساكنه في مكان بسيط وهادئ فجاه صار تحول كبير بحياتي وانتقلت لمدينه كبيره صحيح انا من زمان كان حلمي انتقل لمكان اكبر من الي انا فيه بس لما جربت حسيت اني فقدت نفسي بهذا المكان الواسع. في جزء كبير من شخصيتي فقدته ونفسي استرجعه

. بعدها بسنين قررت اترك هذي المدينه لاني تعبت من الحياه السريعه والصخب واشتقت للهدوؤ و البساطه وان يومي يمشي ببطء وبركه. انتقلت لمكان ولادتي وهذا المكان صغير وهادئ ، عشت فيه سنه جميله جدا كل يوم اطلع امشي لساعات مع نفسي روتيني بسيط جدا و كنت اتشوق انام عشان اصحى واعيش هذا الروتين كنت مختلطه في الطبيعه بشكل مباشر .كان اجمل وقت في حياتي لما كنت اصحى الفجر واروح للحديقه عشان استنى شروق الشمس والعشب كان بارد وريحته جميله وكان في ورود لونها وري وابيض منتشر في كل بقعه. والسماء الوانها تبداء تفتح باتدريج وشوي تظهر السحب، والشمس تطلع بهدوء الوانها كانت جميله درجات البرتقالي الين ما تطلع بلونها الأصفر الجميل.

كنت أحب اروح العصر واجلس عند شجره معينه اجلس اكتب الى مغيب الشمس. ولكن تشاء الاقدار اني ارجع للمدينه مره ثانيه صراحه واجهت سنه كامله من الصراع النفسي والارق والتوتر. لانني ماني مرتاحه وراضيه تأقلمت على الهدوء والاستقرار و الراحه النفسية. بعدها بسنه شفت وضعي النفسي مدمر وحالتي في استياء من هنا قررت ارضا بقدر ربي و انه عنده الحكمه اني ارجع هنا، فرضيت والحمدلله حسيت بتحسن بنفسيتي رغم اني احس في أشياء لسى ما تأقلمت عليها وقاعده اشتغل على هذا الشيء. لكن الي تعلمته الرضا بالقدر يعتبر نوع من أنواع العنايه النفسيه إنك تسلمي أمور حياتك لله وتحطين ببالك أي شيء من الله خير حتى لو من وجهت نظرنا انه شر الله يعلم وانتم لا تعلمون فا من هنا نفسك ترتاح لو ايش ما صار خلاص امرك برعاية الله ومستقبلك في يده وعمره مارح يضرك ويضيعك