تجربتي مع العزله في شهر رمضان

اهلا يا أصدقاء كيف حالكم، و كل عام وانتم بخير وصحه و سلامه بمناسبة العيد السعيد . مره فقدتكم وحشتوني كثير كثير، كيف كان شهر رمضان معكم ان شاء الله العباده كانت ميسره لكم ، وحققتوا اهدافكم للشهر. انا عن نفسي راضيه تماماً عن انجازاتي في الشهر كامل الحمدلله، فعشان كذا حابه أشارك معكم تجربتي مع العزله في شهر رمضان وذلك بتلخيص الاربع الاسابيع : كيف كنت اقضيهم و ايش الي مريت فيه خلالهم ورايي النهائي من التجربه

الأسبوع الاول

كنت مره متحمسه للشهر على الرغم من الاجهاد الجسدي الي عندي بس هذا ما وقف حماسي ماشاء الله. اليوم الأول كان مريح و سريع جدا ماحسيت بالمشاعر السلبيه الي كنت احسها كل اول يوم رمضان، بالعكس كنت احس بهدوء و رضا داخلي ماشاء الله. لكن فجاءه بعد المغرب انتابتني مشاعر تعرفون ما احس فيها الا في رمضان و العيد و هذي كانت سبب من الأسباب الي تخليني أخاف من قدوم رمضان و العيد اني اختبر هذي المشاعر و تجدد علي الجروح. بس هذي المره حبيت اني اتعامل معها صح و ما اجاهلها و احس فيها و اتشافى منها

حسيت فيهم و تقبلتهم و سبحان الله كان وقعهم علي هذي السنه اقل و اخف لاني مستعده لهم و لاني عارفه كيف اتعامل معهم الحمدلله. كمان في شيء استشعرته من اول يوم الى نهاية الأسبوع و الي هي الأفكار السلبيه يعني أي شيء ضايقني زمان او ألمني او حتى موقف محرج مريت فيه او شيء غلطت فيه احس اني اسمعهم كانوا في احد قدامي يقولهم لي شيء عجيب

يعني على سبيل المثال لو سمعت معلومه معينه من فيديو ، فجاءه تجيني أفكار عن موقف محرج صار معي بخصوص هذي المعلومه و يكون هذا الموقف له سنين و ممكن يكون و انا صغيره كمان بس ما ادري ليه عقلي الباطن قاعد يسترجعه الحين بذات. سألت الناس الي حولي اذا يصير معهم مثلي قالوا حتى هم قاعد يصير لهم نفس الشيء، مره ارتحت لما عرفت الحمدلله

بس ما كنت اجاوب معها كنت اطنشها و لا كاني اسمع شيء. بالنسبه للعبادات هي كانت هدفي الأساسي و المهم و أي شيء ثاني يعتبر ثانوي، فعشان كذا ما كنت اضغط على نفسي بالروتين . فا اول يوم حاولة اعبي جدول الساعات باشياء كثير و كنت متلخبطه لان روتين جديد علي ولسى ما اعرف ايش لازم اسوي

يوم الأربعاء قررت اطلع اغير جو لاني مخنوقه من جلست البيت و الروتين الملخبط .حابه اجلس مع نفسي شوي اهدي اعصابي. اخذت معي النوته حقتي الي سويتها معكم عشان اكتب شوي بعدها قرأت هذا الكتاب الجميل . سبحان الله حتى الخروج في رمضان له نكهه غير عن أي وقت ثاني مره انبسطت لما طلعت

سويت كيكة الحمار الوحشي بالزبده اجلكم الله، اسفه اسمها مو لطيف بس مو مني و الله هههه التسميه جات بسبب شكلها من داخل اتوقع نفس شكل الخطوط الي على جسمه. كانت تحفه فعلاً زبده ماشاء الله تذوب ذوب انصحكم فيها طبعاً بس تجاهلوا الاسم

الأسبوع الثاني

بدايته كانت صعبه علي انتابتني مشاعر خوف و ضيقه مو طبيعيه بس الحمدلله عدت على خير. وقتها حبيت اني اجلس اتابع فلم كرتوني عشان اغير من نفسيتي. الفلم اسمه بامبي مره كان حلو و قصته بسيطه اكيد عرفتوه من الصوره ، هذا المشهد انتشر بمواقع التواصل كثير

الارنب الذكر اسمه ثامبر وقعت في غرامه وهو صغير ياقلبي عليه كان صريح جدا يقول الكلام الي بباله من غير تغليف و احياناً امه تكون حاضره في بعض محادثاته مع اصحابه فتقوم تقوله ثامبر ايش قالك ابوك الصباح . يبداء يخجل ويكرر توصية ابوه له الصباح وهو من جواته غير مقتنع هههه،بصراحه اعطى جوا حلو للفلم و حبيت شخصيته مره

استغليت الفرصه اني اروح كوفي جديد توه فاتح للتجريب بس عجبتني قهوتهم ماشاء. و اكيد لازم اروح المقهى حقي المفضل. و اخذت معي الكتاب حقي عشان اقراء و النوته عشان ادون

الأسبوع الثاني يصادف فيه مناسبة يوم ميلادي ، ايوه انا من مواليد شهر رمضان المبارك يعني احس شيء مميز ماشاء الله. و ياعمري البنك محتفل فيه اكثر مني شكرا على المبادره الحلوه بس ياريت لو كانت فلوس كانت احلى و احلى ، او ان شاء الله كوبون شراء انا راضيه هههههه امزح طبعا ً. انا ما احتفل بيوم ميلادي ابداً لكن احب اسوي شيء اني اكتب لنفسي رساله يعني نفس امنيه انا ايش أتمنى احقق في عمري الجديد و على مرور السنه و بيوم ميلادي الجديد اقراء رسالتي لنفسي . اشوف هل وصلت الى الأشياء الي تمنيتها او لا. هذي السنه حبيت تكون مختلفه شوي بدل ما اكتب رساله سألت نفسي ايش الدروس الي تعلمتها بعمري الجديد و حابه ان شاء الله اشاركها معكم قريب

بالنسبه للروتين حبيت اني ارجع لنفس روتيني قبل الي هو اني اجلس يوم السبت اخطط للأسبوع كامل ، و احس بثقه هذا الأسبوع لاني صرت اعرف تقريبا كيف روتيني ماشي. يعني في أشياء اسويها يوميا و أشياء كم مره بالاسبوع و اشياء اسويها أسبوعيا

سويت هذا الأسبوع حلا السنيكرز لذيذ ماشاء الله بس نسيت اصور قطعه يلا مو مشكله. وسويت بطاطا بالباشميل مره خطيره كان نفسي فيها من زمان

طبعا كنت اقراء من كتاب السيره النبويه طول هذي الفتره، وفي قصه مره حلوه وأول مره اعرفها هي عن مدينه عندنا في السعودية اسمها الطائف ممكن مارح تهم بعضكم بس خذوها من باب التثقيف: كانت الطائف تعرف باسم "وج" نسبه الى وج بن عبد الحي، احد العمالقه الذين سكنوها (العماليق او العمالقه هم قوم يقال ان يرجع نسبهم الى النبي نوح عليه السلام و الله اعلم، اذ قد وصفوا بالطول الفارع وضخامة الاجسام) رحلت اليهم قبيلة هوازن من وادي القُرَى، و تزوج زعيمها قسب بن منبه بن بكر بن هوازن بابنة زعيم وج عامر العدواني، واشتهر قسب باسم ثقيف فيما بعد. وعندما تكاثروا بنوا سوراً ليكون حصناَ، وأطلق عليه الطائف لإطافته بهم ومن ثم عرفت هذه المدينة بالطائف بدلاً من وج

الأسبوع الثالث

هذا الأسبوع حسيت بملل فضيع من الروتين ، ابغى اجدد و اسوي شيء جديد فقررت اني اطلع من البيت مرتين بالاسبوع و بالمصادفه اني طلعت يومين وراء بعض لنفس المكان. بكل امانه عجبني الكوفي انه هادي ومافي زباين مره مستمتعه بذا الشيء، يعني تخيلوا رحت بيوم جلست ساعتين و اكثر مافي غيري شعور جميل صراحه

المهم فيه زبون صرت اشوفه لما اروح هناك كثير أتوقع انه كاتب لان بالصدفه -مو قصدي اختلس النظر- شفت معه كتاب مسوده فيه صورته ، ما شاء الله ربي يسر امره و العقبه لي ان شاء الله

بهذا الأسبوع حسيت بفخر بنفسي اني الحمدلله ماشيه على خطتي لشهر رمضان مضبوط ماشاء الله و ممتنه ان الحمدلله لحد الان انا مبسوطه بالشهر و اجواءه و ما نفسي يخلص صراحه. يعني هذا الكلام انا اكتبه و احسه شيء غريب وعجيب علي ، الحمدلله ان ربي ساعدني اني أعيش رمضان مختلف عن اي سنه سابقه و عرف نيتي الحمدلله. حسيت اني اشتقت لموقعي و الكتابه و روتيني قبل رمضان مره ، فقلت اشوف بدون ضغط رح أحاول اكتب محتوى للموقع . بس للاسف ماقدرت فقلت خلاص مو ضروري الحين لاحقه باذن الله

قررت اني امارس هواية الخبز لان بكل صراحه نفسي امارس اي هوايه من هواياتي مره اشتقت لهم . حبيت اغير و احط عليها صوص اشتريته جديد وهو بديل الكندر كان تحفه ماشاء الله

بيوم قبل ما انام كنت بشوف اذا حلقة الانمي حقي نزل او لا، و فجأه اشوف هذا الفلم قرأت ملخصه و تحمست له ، انا ما تابعت أفلام امريكي او بريطاني قديم كثير بس الي شفتهم كانوا مره حماس. هذا الفلم عن جريمة قتل مارح اكتب الملخص شوفوه احسن مره بسيط بس مثير ، كاتبين في نهايته يفضل الي شاف الفلم ما يحكي الملخص عشان ما يحرق النهاية . لان صراحه النهايه صدمه بس هذا الي اقدر اكتبه لكم ههههه

الأسبوع الرابع

لاحظت حاجه من بداية رمضان الي هي كل يوم سبت اتعب نفسيا و اكتئب ليش ما ادري ، طيب ليش السبت مو يوم ثاني الله اعلم هههههه. المهم في هذا الأسبوع حسيت انو خلاص لازم بالتدريج ابداء اخطط للشهر الجاي باذن الله و ارتب مواضيع المحتويات. كنت مبسوطه و فرحانه لأني اشتقت لروتيني اليومي و روتيني مع الموقع . بس كنت حاطه ببالي ان لسى رمضان ماخلص و اخر الأيام يجب الاجتهاد فيها اكثر من قبل

حبيت اني اطلع اكتب في المقهى يالله قد ايش كنت مبسوطه و انا رايحه و انا قاعده اجهز للطلعه شعور جميل جدا. بعدما خلصت حبيت أشوف الكتب الي عندهم ، لاني خلصت قراءة كتابي و كنت ناويه اخذ بريك عن القراءة بس ماقدرت كنت بملل و فراغ شديد

المهم نفسي اقراء كتاب عربي لان لي شهرين اقراء كتب انجليزية ،و لقيت هذا الكتاب رائع سمعت عنه في برنامج ثقافي، رح اكتب عنه بيوم ان شاء الله بس مبدأين مشوق

اخر كم يوم جلست خططت فيهم بتوسع عن برنامجي بعد رمضان و العيد باذن الله و اكيد رح اشاركها معكم ان شاء الله. و قضيت اخر يومين اسوي عنايه شخصيه مكثفه استعداد للعيد

رأيي النهائي من التجربه

الحمدلله انا راضيه اتم الرضا عن تجربتي في رمضان هذا و بكل صراحه هذا افضل رمضان مر علي في حياتي كلها الحمدلله. انا ممتنه لله على تيسيره لي في العباده و حتى اللحظات الصعبه الحمدلله عليها. الي عجبني اكثر اني صنعت فيه ذكريات حلوه و حسيت بروح الشهر و اجواءه لأول مره من سنين. حاولت اني اركز على نفسي و اني ما اخلي شي يضايقني او يخرب هدفي من الشهر، اني احس بالراحه الداخليه و السكينه و الاطمئنان و ايضا الجانب الديني اقوم فيه باكمل وجه. و هذا الشيء الي وصلت له بفضل من الله طبعاً، يعني تجربتي كانت ناجحه الحمدلله و حققت كل شي تمنيته و خططت له فيه . و انتم كيف كان رمضانكم ان شاء الله حققتوا اهدافكم ؟ و هل انتم راضين عن تجربتكم في الشهر؟

مقالات ذات صله