يوم في حياتي- يوم السبت للتنظيم

اقضوا معاي يوم من ايام السبت في حياتي. هذا اليوم يعتبر يوم التنظيم في الغالب اقضيه اني اخطط وارتب للاسبوع كامل. هذا الاسبوع سويت تخطيط ، جدول المصاريف ، عناية شخصيه، في شغله مضايقتني؟

مبيض الاسنان — الساعه ٥ الفجر

عناية الاسنان

بما ان الحين احنا نعتبر في بداية الشهر فا انا متعوده اسوي روتين عنايه عميق للكل جزء لجسمي بهذا الوقت. انا صارلي قرابة الشهر ونص او شهرين استخدم مبيض الاسنان هذا . بكل امانه ماهو رائع بس يمشي الحال فاضل لي شريط واحد بس. طبعا لازم استمر ثلاث شهور او شهرين عشان اشوف النتيجه مثل ماهم كاتبين في التعليمات رح ارجع اشتري علبه ان شاء الله واشوف الفرق. بس بحاول اني ما اتغافل عنه خاصه هذي الفتره قاعده اشرب مشروبات حاره كثير ما شاء الله و بعضها يصبغ الاسنان مثل شاي الكركم و الشاي الثاني الي رح اخبركم عنه بعد شوي باذن الله

صحيت على الساعه ٤ صحاني المندوب عشان استلم الطلبيه مره متحمسه لها . سويت روتيني اول ما اصحى على السريع ، شربت كاسة مويا و على طول سويت لي عصير الخضار . انا زمان كنت اول ما اصحى اشرب قهوه بس حسيت انه غلط فصرت اشرب مويا اجلس ساعه كذا او نص ساعه اكل بعدها اشرب قهوه. و الحين صرت اشرب مويا بعدها هذا العصير

هذا اول الاشياء الي وصلتني من طلبيتي نوته للتخطيط الاسبوعي ، انا زمان حاولت اخطط بشكل يومي بس فشلت فشل ذريع كنت احس بتعب نفسي و توتر. بعدها جربت التخطيط الاسبوعي و ارتحت الحمدلله، يصير اكتب قائمه في الاشياء الي ابغى اسويها خلال الاسبوع و كل يوم اصحى اسوي شيء من اللسته . و في نهاية الاسبوع احط علامه على الاشياء الي انجزتها فيها، و الي ما سويته اخليه للاسبوع الي بعده . لكن حابه اكون اكثر نظام و ارجع اجرب هذا المخطط

تجربه اولى

طبعا نسيت ان النوته باللغه الانجليزيه يعني في اشياء لازم اغيرها فيها

اول شيء سويته غيرت الايام، عندهم يبداء الاسبوع من الاثنين الى الجمعه انا ابغى اول صفحه على اليسار تكون ليوم السبت ارتب فيها اللسته ، و الصفحه الثانيه لباقي الايام. يعني رح يبداء اسبوعي الفعلي من يوم الاحد. سويت اول شيء مثل دائما اكتب المهام، بعدها رحت وزعتها على باقي الايام بكل امانه بشكل عشوائي لان روتيني نفسه اسبوعيا، باختلاف العنايه الشخصيه. بعدها كتبت مراجعه مختصره لمهام الاسبوع الي فات، و كتبت ايش انجزت بيوم السبت من القائمه الحاليه. و حطيت علامه على الاشياء الي انجزتها. انا حطيت المهام بشكل عشوائي في الايام لاني ممكن ابدل بين يومين يعني مو شرط التزم بمهام اليوم نفسه بسبب ظروفي عشان كذا ابدل مع يوم ثاني . انا ماشفت فيديو عن التخطيط بكل صراحه فكل هذا الي سويته من نفسي بس ممكن رح اشوف فيديوهات من باب المعرفه و الالهام باذن الله

انا اول ما تركت الوظيفه و قررت افتح الموقع سويت جدول او منظم في اكسل. عشان مصاريف الموقع ابغى اعرف كم اصرف عليه و عشان بعد اكون مرتبه ، بس بعدها صرت احط فيه مصاريفي حقت الشهر الي ما تخص الموقع. طبعا وقتها سويته على السريع لكن لازم ارجع اسويه مره ثانيه لمصاريفي الشهريه و السنوية بشكل عام . انا ارجع له من بين فتره و فتره احدث عليه يعني لو عندي قسط اكتبه و لو خلصته احذفه من القائمه او اشوف ايش عندي دفعيه هذا الشهر و كذا . انا حابه اكتب عن موضوع الميزانيه و كيف اصرف و اوفر فلوس بس احس بتردد هل فيه احد منكم رح يهتم بهذا الموضوع لو كتبته؟ احسه موضوع جدا مهم خاصه لو احد مثلي يحاول يبداء مشروعه الخاص و كيف لازم يرتب اموره الماديه. ياريت لو فيه قائمة تصويت هنا عشان اعرف هل فيه احد مهتم لو حبيت اكتب عن موضوع الميزانيه عشان ما اتعب نفسي بالاخر ما احد يقراء المحتوى هههه

حاولت اخلص مهامي بسرعه عشان ابغى اطلع . هذا مكان في حينا مره جميل ما شاء الله اغبط الي ساكنين عنده. لو بيتنا قريب منه كان كل يوم اجلس هنا و ما اروح كافيهات و اتعب نفسي اجلس مع الطبيعه و اريح اعصابي من الدنيا. احكي لكم شيء تدرون اني زمان ما اطلع من البيت نهائيا لو ايش ما يصير ما احب اطلع لا مولات و لا كافيهات و لا سفرات. بس الحين ما شاء الله الوضع اختلف احس نفسي بس اطلع لو مشوار السوبرماركت عادي عندي المهم لازم كل يوم اطلع ما شاء الله. يعني حدي يوم اجلس في البيت و ضروري اطلع اليوم الي بعده لو اجلس قدام البيت مع البسس

رجعت على البيت الساعه ١٢ ونص و كان عندي تنظيف في البيت خلصته و بعدها طبخت و اكلت. انا من الناس ما اعرف اسوي كشنه او تسبيكه او حميسه في دول يسمونها ( اني احمس البصل والثوم مع الزيت على النار) و اكل بملابس ريحتها طبخ ما اقدر ما ارتاح نفسيا، عشان كذا اطبخ طبخاتي سريعه بدون كشنه و يصير احط بصل و ثوم بودر عشان ريحتهم ما تعلق بملابسي و اعرف اكل. او اذا كانت الاكله تحتاج كشنه و اذا مطوله في الطبخ اروح استحم اثناء طبخها . ثاني سبب لاني لو اكلت و استحميت بعدها على طول احس اني اجلكم الله ابغى ارجع هل فيه احد فيكم صار معه كذا مثلي ؟ يصير لو اكلت قبل ما استحم اجلس ساعه الى ساعتين عشان اقدر استحم. ماعلينا هذولا ثاني شغله استلمتهم اليوم من الطلبيه، اول شيء حجمهم ما شاء الله عملاق ما توقعت ابدا . يعني رح يكفوني لاشهر قدام باذن الله. الاول مضاد للبكتريا قبل ما اشتريه كان مكتوب بالوصف انه للرجال قلت ايش معنى و طلبته و فعلا ريحته عطر رجالي يجنن انا اعشق العطور الرجاليه ، احس اني استحم بعطر مو جل استحمام و الرغوه خيال ما شاء الله و ينظف مضبوط بس ريحته قويه للي ما يتحملون الروايح القويه، طبعا استخدمه اول شيء مثل ما شرحت لكم من قبل عن روتين الاستحمام حقي. الثاني ريحته حلوه يعني ريحت فاكهه ، ريحت خوخ او مشمش او اناناس واحد فيهم، يرطب البشره وريحته ماهي قويه مثل الاول . صراحه توفقت فيهم ماشاء احس اني مبسوطه فيهم جدا

بيوم كنت اتابع وحده على الإنستغرام و كانت تشرب شاهي رمان، ما شاء الله يا مال العافيه حسيت اشتهيته مره. رحت من أسبوع كذا لمحل شاهي و قهوه عندنا في الحي وحصلته كنت مبسوطه جدا. هو شاهي رمان و فيه توت و كركديه و اعشاب ثانيه ، بس مره طعم صرت اشربه كل يوم في هذا الوقت سبحان الله مره يهدي اعصابي لان فيه كركديه و يريحني نفسيا و حتى لاحظت لما أكون مرهقه وجسمي مكسر اتنشط بعد ما اشربه ما ادري ايش الرابط. المهم حابه افضفض معكم شوي و احكي لكم عن حاجه مضايقتني مره

عمركم حسيتوا ان انتم ناس لطيفه و مسالمه تبغون بس تعيشون بامان و هدوء و سلام. تحسون ان مافي احد يستاهل لكم و ان انتم من جواتكم تحسون ان قيمتكم عاليه ، و الي قاعد يصيرلكم بحياتكم ما تستاهلونه و تحسون بضعف و تقولون ياريت لو املك ياريت لو عندي و تعز عليكم أنفسكم من الأشياء الصعبه الي قاعده تصير لكم لان الناس ما تستاهلكم و انتم افضل و ارقى انكم بس تناظرون فيهم . يعني أتمنى دائما اني اصحى من النوم واحصل نفسي بواقع ثاني و مختلف انا متحكمه فيه واعيش الحياه الي اتمناها . تعرفون ان في ناس شريره و تحب تإذي غيرها حتى من غير سبب. هذا شيء جديد ما كنت اعرفه، يعني انا مو مدح في نفسي انا شخص مسالم جدا حالي حال نفسي يومي كيف بعيشه، كيف اغير من و ضعي ، ايش خططي للمستقبل و احلم و اتفأل . بس على كل هذا تعرفون ان في ناس ماهي مخليتني في حالي انا شاغله حياتهم وتفكيرهم و انا حرفيا مشغوله بنفسي و معتزله العالم باسره. هل هذا الشي مسبب لهم استفزاز، إني مجاهلتهم هل هذا ذنبي إني ما احب وجع الراس. يعني زمان كنت اسكت و ما أرد و اكتم في قلبي و احزن و اتضايق. بس مؤخرا صرت ما اسكت وأقول الي بقلبي و انفجر بس هم صاروا يشوفون هذا الشيء غلط لا اسكتي و لا تعبرين نبغى نأذيك براحتنا. احس طفشت ما ادري ايش اسوي او ايش الحل؟ انا خايفه على نفسي و على اعصابي و عقلي . كيف احمي نفسي من هذه الدوامه احس جواتي شخص عنده أشياء كثيره جميله ما شاء الله بس ماهو عارف كيف يساعد نفسه يكون في المكان الصح او ظروفه ماهي مساعده أتمنى تكونون فهمتوني

مقالات ذات صله