ثلاث ايام في حياتي-ايام دافئه

اقضوا معاي ثلاث ايام في حياتي ايامي في بداية الشتاء سويت فيهم فعاليا كثيره منها. سويت كيكه المانيه، رئة الفشار؟، ضيق الرزق، كنت افكر فيه و طلع لي !، طلعت مقهى، راجعت حياتي

يوم الخميس

الساعه ٥ العصر

انا صاحيه و كلي حماس ما شاء الله لاني مليت من كثر ما اجل في عمل الكيكه هذي. نفسي فيها من أسبوعين بس ما كنت قادره اسويها بس قلت خلاص يكفي مماطله لازم اليوم باذن الله اسويها. انا سويتها من قبل و اعجبتني مره اسمها كيكة الشوكلاته و هي المانيه. انا بالمجمل و صفات الكيك اخذها من شيف الماني و شيف إيطالي. لان و صفاتهم سهله و سريعه و الخطوات واضحه ماهي معقده. فيه واحد فيهم يكتب في العناوين كيك في خمس دقايق صحيح و صفاتك سريعه ما شاء الله بس ما توصل في خمس دقايق ههههه. انا لو ربي يريحني من موضوع اني اطلع المقادير انا رح أكون مبسوطه لانها هي الي تأخذ الوقت الأكبر من وقتي و لاني احط الدقيق و البيض في الثلاجه لازم اطلعهم فتره عشان يصيرون بدرجة حرارة الغرفه. بس لقيت حيله للبيض عشان اخليه بدرجة حرارة الغرفه بسرعه، اني احطه في كاس واغسله في مويا دافيه كاني اغسل خضار يعني ما اطبخه عشان ما ينضج غسل سريع تحت مويا جاريه ، لكن للامانه انا ما جربتها لسى بس قلت فكره ممتازه

كيكة الشوكلاته — طريقه عمل الكيكه

المقادير

حبيت أشارك معكم الوصفه و الطريقه لان الكيكه حرفيا تحفه سووها ولا تندمون. اول شيء اخلط البيض مع السكر و الفانيلا مع بعض الى ان يذوب السكر، بعدها اضيف الزيت و اخلطه شوي الى ان ينمزج مع الخليط بعدها اضيف الحليب و اسوي نفس الشيء . بعدين اضيف المواد الجافه على السائله الي هيا الطحين او الدقيق مع البيكينج باودر و رشت الملح ( الي هي ربع ملعقه صغيره نسيت اكتبها في الصوره) ، اخلطهم مع بعض الى ان يتجانسون ما ابالغ في الخلط. بعدها ادهن الصينيه بزيت او زبده و انزل الخليط فيها اطلع الهواء من الصينيه اني اخبط الصينيه على الطاوله خبطه خفيفه عشان اطلع الفقاعات مو بقوه تكسرين الصينيه هههه. ادخلها الفرن ( الفرن الي استخدمه كهربائي) على درجة حراره ١٨٠ من تحت لمدة ٣٥ دقيقه الى ٤٠ دقيقه اشيك عليها بعود اسنان او سكينه اذا ما عندك العود الخاص في الكيك عشان اشوف اذا استوت او لا. بعد ما تستوي من تحت اشغل عليها من فوق تستوي لمدة ١٠ الى ١١ دقيقه

مقادير الحشوه

الحين اجهز للحشو احط كريمة الخفق او القشطه ( اذا استعملتي قشطه حطي عليها ملعقه او ملعقتين حليب سائل عشان القوام يصير اخف و انتي ورغبتك في القوام تبغينه خفيف او ثقيل انتي حره) مع الشوكلاته في المكرويف لمدة ٥٠ ثانيه فقط، اطلعها واخلط الخليط عشان يتجانس و اذا ما عندك مايكرويف ذوبيهم في حمام مائي على النار

كيكه المانيه — طريقة الحشو

بعدها اسوي فراغات في الكيكه بهذا الشكل عشان اقدر احشي الكيكه اسويها في نهاية الملعقه او مقبض الملعقه او يد الملعقه او طرف الملعقه ما ادري ايش تسمونه هههه. المهم بعدها احط الخليط في الفراغات . معلومه الحشو كثير على الفراغات فعشان كذا انا كل مره اقلل الكميه الي في الوصفه على كل هذا يزيد بس الي يزيد مني في الحشوه احطه على الصوص في النهايه ما ارمي شيء انا

اجيب كاسروله او قدر صغير و احط فيه الكاكاو البودر ، النسكافيه و السكر . نحط عليهم الحليب و نخلطهم على البارد بعدها احطهم على نار متوسطه و نخلطهم مع بعض الى ان اشوف الخليط بداء يصير دافي هنا احط الزبده و الشوكلاته الحبيبات . اخلطهم مع بعض الى ان الخليط يطلع فقاع و ان كل شيء تجانس مع بعض. بعدها اجيب النشاء و اذوبه في المويا كويس و احطه على الصوص نخلطهم كويس مع بعض يعني لمدة دقيقه و نص كذا. نضيف الصوص على الكيكه و اخر شيء نزين الكيكه برشه من جوز الهند المبشور. ادخلها الثلاجه عشان الصوص و الحشوه يجمدون

كنت جالسه اتصفح بأحد البرامج و طلع لي فيديو وحده امريكيه تتكلم عن محادثه صارت ما بينها و بين معالجتها النفسية. قالت انا غيرت أشياء كثير غلط في حياتي، و لكن في شيء واحد ماني قادره اتركه و هو الشيشة الإلكترونية او الفيب مثل ما يسمونه الحين. دكتورتها النفسية عشان تساعدها تقلع عنها قالت لها ايش رائيك لو تروحين تبحثين عن مرض اسمه رئة الفشار. و فعلا بحثت عنه و قالت من لما عرفت عن مخاطره قلت لنفسي مافي شيء مهم بهذي الدنيا اني اضيع صحتي عشانه و من بعدها وقفت التدخين. انا هنا جاني فضول ايش هذا المرض اسمه غريب و عجيب. رئة الفشار هو مرض يسبب في اتلاف أصغر الممرات الهوائية في الرئه. ليش سمي بمرض رئة الفشار ؟ لان اول ما اكتشف هذا المرض بين عمال مصانع الفشار الجاهز (الفشار الي يكون منكه و جاهز و نضعه في الميكرويف لدقائق)، بسبب انهم يستنشقون ماده كيميائيه بكثرة فتسبب لهم التهابات، ثم تلف بالرئه. هذه المادة توضع على الفشار كا منكه حتى يكون طعمه مثل الزبده. و أيضا اكتشفوا ان المرض منتشر عند عمال مصانع تحميص القهوه لان الماده الكيميائيه نفسها موجودة في بن القهوه سبحان الله. اعراض المرض: الكحه مع أحيانا بلغم، الم في الصدر، صفير في الصدر عند التنفس، الشعور بالتعب بعد أي مجهود عضلي خاصه بعد الرياضه ، قصر النفس ، التعرق اثناء النوم، الطفح الجلدي و الحمى. الحمدلله على الصحه بس لما شفت الاعراض قلت مافي شيء مستاهل اضيع صحتي عليه ، خاصه الحين في ناس ما خذينها موضه الله يهدي الجميع . بس في ناس يحسونها تنفيس لهم وهم الأصعب في رائيي لأنها تعتبر ادمان و روتين بالنسبه لهم، ضروري يلاقون البديل لها عشان يتخلصون منها. ربي يعافينا جميعا

جالسه و افكر مع نفسي عن موضوع مهم اكيد عرفتوا اني احب افكر و اتكلم مع نفسي يعني هذا الموضوع ماله سبب بس خطر ببالي و جلست اتسأل فيه و هو ضيق الرزق

الرزق اقصد فيه هنا مو بس الاشياء الماديه اقصد فيه أيضا، الصحه ، العافيه، الهدوء ، البركه ، النوم، الامان، الاهل ، الأصدقاء. اذا كنت تعاني من ضيق الرزق فهذا الكلام لك. الي قاعد يصير لك من تفكير زايد وساوس هذا شيء طبيعي أولا لأننا بشر معرضين لهذا الامر طالما احنا عايشين على هذي الدينا. نفضل نفكر و نتعب و نكتئب لأننا نحس ان الشيء الي نبغاه و نحلم فيه ما تحقق او نحس بضغط من سرعة الحياه حولنا و تغير الناس المحيطه فينا، و نجلس نحتار و نفكر ، و نقول لأنفسنا طيب احنا ليش حالنا ما تغير الا سبحان الله ربي يضيقها علينا بزياده عن أي شخص اخر. تحس بوجع و مجهد من المحاولات المستمره ، قلة الحيله مافي يدك اكثر من كذا تقدر تسويه. أولا حط ببالك ان انت شخص قوي و سويت فوق طاقتك ، و لو عندك اكثر من الي انت سويته رح تسويه .ثانيا اعرف ان في ناس مثلك كثير قاعدين يمرون بنفس الضيق الي تمر فيه. و الشيء الجميل اننا نتعب بس ما نستسلم نفضل نجتهد لأخر لحظه. ثالثا الله قادر على رزقك مثل ما رزق غيرك كثير بس هذا امتحان و اختبار لك و لي، و احنا قدها بإذن الله المهم ما نفقد الامل. يعني انصحك لما تحس بهذي المشاعر السلبيه ان ما تفكر كثير و تهدي نفسك و اعصابك، لان ما في شيء يستاهل تعب صحتك عشانه او تجهد عقلك بالتفكير عشانه. ضيق الرزق رح ينزاح عنك و يتيسر امرك لو مهما اخذ سنين رح يجي اليوم الي رح تتغير ظروفك للأحسن بأذن الله

يوم الجمعه

قبل ما انام خطر ببالي واحد مشهور امريكي كنت اتابعه زمان ، فجأه خطر ببالي قلت اذا صحيت ان شاء الله رح ابحث عنه ايش صار في حياته لأني لي سنين عن قناة. نمت و صحيت نسيت الامر فجأه كذا امسك الجوال الان وهو يطلع لي اقتراح قناته في صفحتي على اليويتوب حاط عنوان ملخص حياتي في العشرين بخمس دقايق و حاط كلام في الصوره المصغره صار عمري ثلاثين. انا هنا جاتني صدمه كنت بس اليوم افكر فيه و طلع لي صدفه ولا الفيديو ملخص لحياته خلال العشرين كل الفتره الي ما كنت متابعته فيها لخصها لي في خمس دقايق و الفيديو فتح بشكل تلقائي حتى قناته ما دخلتها. سبحان الله كيف جذبته من غير ما ادري أتمنى لو اجذب الأشياء الي ابغاها بهذه السرعه هههه انام و اصحى احصلها متحققه. انا زمان و ما زلت ما اتابع احد في مواقع التواصل الا يكون عندي سبب يعني يكون هذا الشخص يتفق معي بشغله مثلا يحب يقراء كتب، روتين حياته ملهم ليا، او يكون شخص طموح مثل هذا الشخص. تابعته من لما تخرجت في الجامعه و وقتها كنت اتابع امريكان كثير لدرجة كنت احس اني ساكنه في أمريكا مع اني ما رحت لها في حياتي. هذا المشهور كان غير الي كنت اشوفهم هناك يعني كان عنده هدف من الشهره و كان انسان طموح جدا ما شاء الله ، صحيح هو اصغر مني بس كان ملهم ليا بطموحه وقتها كان يبين عيشته الحقيقه في الولايه الي ساكن فيها لانها حلم و طموح كثير من الناس الي تبحث عن الشهر و الحلم الأمريكي. بعدها تزوج و كان يسوي فلوقات مع زوجته و كيف زوجته قاعده تتعايش مع العيشه في أمريكا لانها مو امريكيه. فكانت الغربه مأثره عليها و تشتاق لاهلها ، أصحابها و دولتها. بعدها قرروا ينتقلون للولايه الي ولد و تربى فيها سبب من الأسباب لانه هو الابن الكبير و كان يشارك امه في رعاية اخوانه الصغار، اذكر ابوه يا متوفي يا هاجرهم ناسيه و الله لان الموضوع له سنوات. اشترى بيت في مسقط رأسه و وقتها زوجته كانت حامل في الأشهر الأولى . فصارت فيديوهاته عباره عن مواعيد الدكتورة اعراض الحمل ، وقتها حسيت اني مليت انا مو هذا المحتوى الي تابعتك عشانه فا الغيت المتابعه. انا تابعته زمان لاني كنت اشوفه ما شاء الله طموح و كنت احسه رجال مثل ما نقول حنا في العاميه- يعني فيه صفات رجوله كثير ما شاء الله رغم صغر سنه الا انه كان قايم بدوره كا ابن و اخ و زوج و بنفس الوقت كان يسعى لطموحه. فا ما شاء الله بمرحلة العشرين حقق و انجز أشياء كثير بس باقي حلم واحد يبغى يحققه وهو التمثيل في فلم. حاول كثير عشان يحققه بس ما قدر فقرر الان يسوي فلمه الخاص بنفسه يحكي عن حياته و معاناة اهله. ما شاء هو نفسه ما تغير حتى مع تغير السنين ظل انسان طموح و مجتهد

انا كنت داخله تحدي مع نفسي اني ما اشتري كتب الى ان اخلص الكتب الي موجوده عندي و كنت جدا متحمسه خاصه بعد ما قراءة كتابين كانوا موجودين عندي و حسيت بالقهر اني ما قراءتهم من زمان. و كتبت هذا الكلام في الانستقرام و كنت ماشيه على التحدي تمام الا ان جات التخفيضات، و بدافع الفضول رحت شفت كتابين انا نفسي اشتريهم بس اسعارهم مره مبالغ فيها. فجأه لقيت تخفيض عليهم خيالي ما قدرت صراحه اقاوم و قلت لازم استغل الفرصه لأنها مارح تتكرر بعد كذا. و اشتريتهم على طول من غير تردد، بس حسيت بشوية قهر إني ما التزمت بالوعد بس عادي ارجع التزم فيه بعد ما اشتريتهم. المهم من ثلاث أسابيع فتحت واحد فيهم عشان بقراه طلع كتاب تمارين يعني مو الكتاب نفسه حسيت بقهر والمشكله ما فتحته اول ماوصل كان رجعته ساعتها بس الان خلاص مر وقت طويل عليه. لكن قلت مو مشكله حصل خير و جلست اشوف محتواه و عجبني صراحه. هو عباره عن اسئله عميقه عن المشاعر يعني لو عندك مشكله في موضوع التعبير عن مشاعرك و التعرف عليها ما انصحك تستخدمينه لانه يخليك تعيشين المشاعر الي تحسين فيها و مخبيه جواتك و غالبا هذي المشاعر تكون سلبيه مثل غضب حزن مشاكل داخليه. و يخليك تتعرفين على نفسك من جواء. فصرت اخذه لما اطلع لمقهى و اجلس اتسلى في حل الاسئله صحيح الاسئله جدا عميقه بس ممتعه. ايش رايكم نتسلى مع بعض و اكتب لكم بعض الاسئله الموجوده فيه و نحلها مع بعض ، رح احط الاسئله و اجاباتي و انتم اقراءوها و جاوبوا عليها من جيهتكم

هذه الاسئله من الفصل الأول عنوان الفصل ماهي المشاعر او العواطف

١-السعاده

حدد الأشياء الي تعتقد انها تمنحك جرعه من الدوبامين مثل ( العاب الفيديو، مواقع التواصل الاجتماعي) اكتب اجابتك في الفراغ

اجابتي

-موقعي

-الكتابه

-التدوين اليومي

-القهوه

-الخبز

-اطلع براء البيت

-اقراء روايات

أي من الأشياء الي ذكرتها سابقا انت مدمن عليها ، أي نشاط تقوم فيه و قررت تأخذ بريك منه تحس انك تشتاق له كثير/ اكتب اجابتك تحت

اجابتي

ثلاث أشياء احبها و ما اقدر استغنى عنها بيومي او اسبوعي، هيا موقعي، الكتابه و القهوه. احس هذه الأشياء هي حياتي في الدنيا ما اقدر استغنى عنهم يعني لما أحاول اخذ بريك من أي واحد فيهم انا حرفيا اكتئب و امرض لانهم مره ضروريين في حياتي

٣- طبيعة الأنا

اكتب الأشياء التي تشعر انك تُعرف فيها اكثر شيء مثال( جسمك ، علاقاتك مع الناس، دولتك، دينك، سيارتك الى اخره.)

اجابتي

موقعي
لهجتي (انا كنت أحس لهجتي عاديه بس من لما سكنت في المدينه الكل صار يسألني انتي من وين و يحسبون أني من نجد لأنها قريبه من اللهجه النجديه. فصارت لهجتي اول شيء الناس تركز عليه لما أتكلم و كثير يشيدون عليها.)
طريقة تفكيري( اقصد هنا طريقة التفكير من ناحية الطموح يعني مثلا موضوع الموقع و الكتابه بشكل عام مافي احد اعرفه سوا مثلي او فكر يسوي مثلي يعني الفكره جديده في محيطي و البيئه الي نشاءة فيها)
-اللغه الانجليزيه (لانه تخصصي في الجامعه)-
النظارات( للأسف نفسي اتخلص منها و الحمدلله صرت اقلل من استخدمها الان بشكل كبير عن زمان يعني قبل كنت ما اقدر افكر من غيرها وصلت لهذه المرحله ، تصدقون اذكر زمان عشان احد يذكرني و يكون ناسي اسمي يقولون هذيك صاحبة النظاره هههههه شيء يقهر
-اللاب توب( انا لما كنت في العشرين كنت مدمنة لاب توب كنت اربع و عشرين ساعه جالسه عليه حرفيا بدون مبالغه ولا اعرف شيء اسمه جوال، هذا اكبر سبب خلاني البس نظاره. بس من لما توظفت خف تعلقي فيه و صرت استخدمه للضروره او للموقع و الكتابه.)
مكان ، و طريقة ولادتي( انا المكان الي ولدت فيه حوش جدتي (الله يرحمها) تحت شجرة السدر و امي ( الله يرحمها) كانت رح تفقد حياتها وقت ولادتي ياحبيبتي ، الناس الي قريبه مني تعرف هذه المعلومة بس. حتى في طريقة ولادتي و المكان الي ولدت فيه مميزه ، و فيه قصه ما شاء الله هذا دليل اني مشروع كاتبه منذ الولاده هههه )

يوم السبت

قهوه و ورده — الساعه ٨ المساء

مراجعه لحياتي

الفجر جلست اخطط وانظم جدولي لهذا الأسبوع لأني كنت مخططه ان شاء الله في هذا الوقت اجلس و اراجع حياتي خلال الست الشهور الي مضت من ناحية اللسته الى ابغى اشتغل عليها في حياتي الي حكيت لكم عنها في شهر ١٢ عشان ادعي فيها بيوم عرفه أتمنى انكم افتكرتوا. اذا كنتم متابعيني من زمان رح تذكرونها لا تغشون من الرابط الي حطيت لكم اياه ههههههههه، يعني تعتبر نفس لوحة الامنيات بس انا اكتبها في يدي من غير ما اعلقها على اللوح . المهم انا كل سته شهور اجلس و اشوف نفسي هل انا مشيت على الخطه او لا هل حققت شيء من الأشياء الي ابغاها او لا عشان أكون منظمه و متابعه حياتي. اول شيء سويته رجعت للسته طبعا انا كنت مستخدمه طريقة الابعاد السبعه للعافيه عشان اعرف كل جانب ايش يحتاج اشتغل عليه فيه و منها اعرف التطور الي حصل لي من ناحيته. و أيضا عشان تكون اهدافي محدده بالتفصيل. طيب هذه الابعاد هي الصحه -العاطفه -الروح – المجتمع- العمل- الاستقرار-الفكر. راجعت انا ايش هدفي في كل واحد فيهم و قارنته بحياتي خلال ست شهور هل فيه تغيير و تطور هل أنجزت او لا، لقيت ما شاء الله اني أنجزت كثير و في أشياء كنت متحمسه بانجازها في البدايه ما شاء الله بس بعدين بسبب الظروف اضطريت أوقفها. و في أشياء ما قدرت أسويها لان مو قوتها فا رح اخليها بوقت اخر باذن الله و أشياء بيد الله يعني انا مالي يد فيها او اني اقدر احققها. بس بشكل عام انا راضيه عن النتيجه و حسيت انه اعطاني حماس اجتهد بإذن الله الى ان يجي شهر ١٢ ان شاء الله اذا ربي كتب لي عمر قبل يوم عرفه و اكتب النتيجه النهائيه. نفسي اعرف هل احد فيكم جربها معي لما كتبت عنها او لا ؟ واذا جربتوها هل راجعتوها مثلي او حابين تخلونها الى نهاية السنه بإذن الله؟. نفسي اكمل باقي يومي معكم بس احس طولة عليكم ما شاء الله في المحتوى اليوم رح اكمل في وقت ثاني باذن الله

مقالات ذات صله