مذكراتي الاسبوعيه-يوم كله نشاط و انجاز

اقضوا معي يوم من حياتي سويت فيه اشياء كثيره : رحت مشوار للمكتبه، طبخت، شفت انيمي لطيف، سويت كيكه طلبيه ؟،روتين الاستحمام الشتوي، جوله في مكتبي، خطتي للمستقبل

اليوم حابه امشي عشان اجيب أغراض محتاجتها من السوبرماركت و المكتبه. و انا ماشيه في الطريق شفت بيوت كانت ارض فاضيه من سنه ماهي مبنيه حرفياً و الا انصدم انهم بنوا بيتين فيها ما شاء الله و واحد فيهم فيه سكان . تعرفون الي جاتني صدمه يعني قلت لهدرجه انا ليا فتره طويله ما مشيت بهذا الطريق او ان الوقت قاعد يمر بسرعه و انا مثل ما انا والله ما ادري بس جاتني لحظت صدمه و حبيت اشاركها معكم

رحت للمكتبه عشان اطبع أوراق رح اقولكم بعدين ليه، و جبت كم غرض من السوبرماركت رح اوريكم ايش اشتريت شويات. بس حابه اوريكم الشنطه هذي مره مفيده ماشاء الله انصحكم فيها اذا انتم حابين تروحون كذا محل و معكم أغراض و حمل الاكياس صعب عليكم اشتروا مثلها و حطوا الأغراض فيها رح تخفف عنكم حمل كبير. صراحه افضل شيء سويته و نصحت اختي فيها و صارت تعتمدها لما تروح السوق

طبعا حجمه كبير ماشاء الله لا يغركم الصوره، اسفه على الزاويه بس حبيت اصور الحين أخاف ارجع البيت و انسى اصور لكم شكله اسفه ياصاحب السياره استخدمت سيارتك كازاوية تصوير ههههه. المهم احكي لكم موقف طريف بخصوص هذه الشنطه ، مره رحت سوبرماركت الصباح و معي هذه الشنطه و كانت فيها أغراض

وقتها الموظف انصدم مني داخله بالشنطه الكبيره هذي ماشاء الله شكلي غريب مره و جلس يناظر فيني نظرت الخوف اني اسرق شيء و احطه بالشنطه و كل مامشيت عند رف اشوفه قاعد يناظر فيني ههههه جلست اضحك جواتي و ما اخذت الامر بمحمل الجد. مقدره خوفه ممكن مر بموقف زي كذا الله اعلم . عن نفسي لسى مستمره اني امشي فيها و ماعلي من الموقف هذا المهم راحتي ههههه

اغراض سوبرماركت — الساعه ٨ المساء

اغراض السوبر ماركت

رجعت الحمدلله بالسلامه و الحين بوريكم ايش جبت من السوبر، انا رحت خصيصاً عشان اجيب زعتر لانه خلص و نفسي فيه مره ماتدرون قد ايش. جبت جبن من غير ملح اكلها مع الزعتر، و حليب عشان نفسي بقهوه بارده . انا كنت كاتبه لسته للأغراض الي ابغى اجيبها من السوبر و المكتبه بس نسيتها في البيت. الحمدلله اني فاكرتها و الحمدلله جبتهم كلهم لكن لو نسيت اجيب هذولا الأشياء الي بصوره خاصه الزعتر رح ازعل من نفسي زعل جامد و راح اخاصمني ليوم كامل عشان ليش نسيت ههههههه

الساعه ٨:٣٠ المساء

روتين الاستحمام الشتوي

انا روتيني بالاستحمام في الشتاء يختلف عن الصيف من ناحية الترطيب فقط. لكن طريقة الاستحمام نفس طريقتي بالصيف و شاركتها معكم من قبل، لكن الشتاء و البروده يسببون جفاف للجلد عشان كذا لازم نرطب طول الوقت. اليوم بسوي تقشير بالسكر و بستخدم الصابونيه هذي بالكركم ماشي حالها ما شفت الفرق الكبير من استعمالها بكل امانه. طبعا بالصوره موضحه بالارقام ترتيب استخدامي للمنتجات

انا ايش اسوي عشان ارطب جسمي اكثر في الشتاء، بعد الاستحمام احط زيت و جسمي مبللول عشان جلدي يتشرب الزيت . ويصير لما اتنشف على شكل طبطبه مو مسح عشان ما امسح الزيت من جلدي. بعدها ادهن بالكريم و احبس الترطيب بزبده الي سويتها معكم من قبل عشان جلدي يكون مترطب لفتره طويله. ماتدرون هذا الروتين قد ايش فادني ماشاء الله يعني ما احتاج ادهن خلال اليوم كثير لان جسمي ماشاء الله مترطب انصحكم بهذا الروتين . بس الزيت انا استخدم زيت نونو لانه خفيف و ريحته جنن ، بس تقدرون تستعملون أي زيت مثل زيت جوجوبا او الارغان او اللوز الحلو الي يريحكم. و بديل الزبده استخدموا زيت مو شرط زبده

ساندوتش زعتر و جبن — الساعه ٨:٣٠ المساء

زعتر و جبن

سويت روتين البشره على السريع لاني مو قادره صراحه ابغى اكل. حظرت ساندويش جبنه بزعتر و اضفت عليهم زيت زيتون و حطيت الخبز يتحمص شوي. و اكلتهم مع خيار و طماطم و سويت شاي بحليب جنبهم، انا ما احب اشرب الشاي ساده لازم احط عليه حليب هل انتم مثلي؟ . من يومين تقريباً طلع لي فيديو لدكتور قاعد يتكلم عن فوائد الزعتر مع زيت الزيتون ياربي قد ايش مفيد، بصراحه يحق لي ادمنه لهذي الدرجه من غير انه طعم فوائده كثيره ما شاء الله

اخدت بريك شوي و الحين بسوي قهوه بارده طبعا هي جاهزه بس احط عليها الحليب، انا احب من هذه الماركه النكهه الاصليه بعدها هذي بعدين الموكا ، اما الباقين ماعجبوني صراحه. بسألكم هل انتم مثلي في الصيف تحبون القهوه الحاره و في الشتاء تشربون البارده كثير ؟ احس اني عكس الناس ما ادري ليه ممكن انتم تطلعون مثلي الله اعلم

حابه اوريكم مكتبي المتواضع المتنقل ههههه. هذه طاوله اشتريتها من خمس سنين تقريباً من لما بديت بأمر انشاء الموقع ، تخيلوا اشتريتها اون لاين ب٢٥.٢٧ ريال و من سنه رحت لمحل توفير لقيت نفس الطاوله باشكال و تفاصيل افضل ب٥.٧٥ ريال متخيلين الفرق الكبير مابين السعرين حسيت بقهر مره ساعتها هههه. بس الي خلاني اطبطب على نفسي ان لما اشتريت الطاوله وقتها ما كنت ساكنه في المدينه عشان كذا طلبتها اون لاين لانها ماكانت موجوده في خيبر

ماعلينا انا حبيت اصور انا وين اشتغل في البيت عشان اوريكم و اوري نفسي انا كيف بدايتي وان شاء الله بيوم من الأيام لما احقق حلمي و يكون عندي مكتب احط الصورتين جمب بعض عشان احس قد ايش انا تعبت و صبرت عشان أوصل للي انا فيه بفضل من الله طبعا ثم كفاحي. و انا عمري ما اخجل من حياتي و ظروفي و البيئة الي طلعت منها الحمدلله انا راضيه بكل فصل عشت فيه بحياتي

جدول ميزانيه — الساعه ١٠:٠٥ المساء

مشتريات المكتبه

اول شيء طبعته بالمكتبه اوراق الميزاينه الي سويتها معكم بس عدلت عليها شوي. انا بديت استخدمها بس في اللاب توب يعني كل ما حبيت اعدل افتح اللاب و اعدل مره شيء متعب عشان كذا حبيت اطبعه عشان يكون بمتناول يدي بشكل سريع. بس طبعا رح اضطر اكتب بالمرسام عشان امسح و اعدل ، بس الخانات الاساسيه رح استخدم القلم لتعبئتها لانها ثابته. و فيه الضروريات طبعتهم مع ارقامهم لانهم ثابتين معادا الأقساط لانه لفتره محدده

طيب الحين بقوم انقل البيانات الي في اللاب على الورقه ، رح احط البيانات الثابته فقط الي ما صرفت منها اما الباقي رح اعدل عليه بعدها رح اعبي البيانات الأخيره في الورقه ورح اشرح كيف. جبت الفاتوره الي من السوبرماركت و حسبت قد ايش انا صرفت من ميزانية السوبر أقوم اجيب المجموع الأخير الي في اللاب و اخصم منه سعر فاتورة السوبر الحاليه و يصير الناتج هو الباقي من ميزانية السوبر أتمنى شرحي يكون وافي لكم

حابه انصحكم نصيحه اذا رحتوا أي مكان مو شرط سوبر أي محل ان شاء الله مطعم دايماً احرصوا انكم تأخذون الفاتوره لأكثر من سبب بس رح اذكر سببين. السبب الأول ان ممكن الموظف بالغلط يخصم مبلغ زيادة او يخصم مبلغ لغرضين بالغلط و تكتشفون من الفاتورة. السبب الثاني عشان ترجعون وتسوون مثلي تعدلون في الميزانيه

الاوراق الثانيه الي طبعته هي اوراق للكتابه تساعدني اخطط للمحتوى بشكل منظم و بترتب افكاري بالكتابه مره فادتني صراحه و صارلي مده طويله استخدمها

معكرونه بالصلصه البيضاء — الساعه ١١:٣٠ المساء

حبيت اطبخ شيء سريع لان عندي شغله ثانيه اسويها بالمطبخ ، بس مارح تأخذ معي وقت بإذن الله

كيكة الشوكلاته — الساعه ١٢ الصباح

طلبية اختي

اختي طلبت مني اسوي كيكه و ما حددت ايش هي بس اهم شيء يكون عليها صوص شوكلاته من براء. سويت هذي الكيكه طبعا لو علي رح افضلها من غير الصوص بس ايش اسوي طلبها

انيمي عن القطط — الساعه ١ باليل

بنت تتحول لقطه

قاعده اتابع انيمي شفته اقتراح من الانستقرام ، الي شدني له موضوع البسس بكل صراحه هههههه. قصته ان بنت مراهقه سوت صفقه مع قط انها تتحول لقطه لساعات عشان تروح تشوف حبيبها متى ماتبغى. طبعا الي تحبه مايبادلها نفس المشاعر يعني حب من طرف واحد عشان كذا سوت الصفقه عشان تكون قريبه منه وهو مايعرف. قصه طريفه و مسليه صراحه يعني مو خساره فيه الوقت بكل امانه

انا اليوم احس اني ما شاء الله رايقه عشان كذا بسوي روتين عناية بشرتي . اول شيء بنظف وجهي بغسول البشره عشان ابداء عنايه بنظافه ، بعدها بعرض بشرتي للبخار لمدة خمس دقائق عشان اشيل الرؤوس السوداء و الدهون . ثم استخدم السنفره ، صحيح هي للجسم بس كاتبين عادي اقدر استخدمها لوجهي. بعدين اغسل وجهي مره ثاني و احط الماسك، هذا ماسك مرطب لان عارفين الجو البارد يجفف البشره

عناية الشفايف/ اقشر شفايفي بهذا الماسك بعدين اغسله. بعدها اجيب خل تفاح و احط شوي منه في منديل واحطه على شفايفي لمدة ٣ ثواني فقط مو اكثر من كذا عشان ما يحرق شفايفي. و اغسلها بالمويا واحط مرطب شفايف او فازلين. هذا الروتين مفيد خاصه اذا كنتي تعانين من تصبغات فيها. سويه مره بالاسبوع فقط

رواية خياليه — الساعه ٥ الفجر

انا بالعاده اقراء اول ما اصحى بس اليوم ما مداني لاني طلعت فابقراء شوي ، صراحه الروايه لحد الان مستمتعه فيها و مافيها مط و ملل بالحوارات هذا اكثر شيء عاجبني

اليوم حابه اكتب عن موضوع خطر ببالي الي هو المستقبل. جلست اسأل نفسي هل انا متحمسه للمستقبل؟ او هل انا مخططه له ؟. خليني أوضح اكثر زمان لما كنت بالعشرين ويجي مثلا احد يسألني سؤال وين تشوفين نفسك بعد خمس سنين؟ اجابتي للسؤال اني ابداء اوصف و احكي عن احلامي و طموحاتي بالرغم في هذاك الوقت كنت امر بظروف صعبه و بمرحله عانيت من اكتئاب شديد و ابتلاءات عظيمه جداً مريت فيها من الصغر الى عمر العشرين. على هذا كنت متفائله ما شاء الله و بنفس الوقت احلامي كانت عباره عن هروب من واقعي اني احلم بمستقبل افضل

كنت متعلقه بموضوع المستقبل والتغيير انا رافضه حياتي الي عايشتها رفض قاطع ما احس بالاستقرار بكل جوانبه. كنت اتفأل ان ممكن بعد شهر حياتي تتغير ممكن بداية السنه تكون خير، سبحان الله مافي شيء يتغير و حالتي تزداد سوء و تعب. الي حدث لما صار عمري ٣٠ سنه جاتني نفس الصدمه ان ما عشت المستقبل الي اطمح له فقررت اني ارجع اعيد فكرتي عن حياتي و احلامي من جديد

خططت اني ابداء اشتغل على نفسي وكنت ماشيه صح بس حصلت ظروف قلبت كل شيء يعني قبلها بشهر كنت عايشه روتين كامل مبسوطه و مرتاحه فيه بعدها حالي اختلف بغمضة عين. عشت سنه من الخوف من بكره و المستقبل انا قلقه ايش بيصيرلي بعد ساعه و مرعوبه وما احس بالامان وصلت لهذي الدرجه. يعني اذكر كنت ارجف و انا نايمه وقلبي يدق بسرعه غير اجلس اتنفس و اطمن نفسي ان شاء الله خير وما في شيء يبعث للقلق و الخوف. بفتره حسيت ان انا قاعده اتعب نفسيتي واخسرها و ضروري اشوف لي حل

فقررت اني ما اهتم بالمستقبل و أعيش يومي و بس ، بالتحديد أعيش اللحظه يعني انا ايش قاعده اسوي الحين فقط. لو ترجعون تسالوني الحين وين تشوفين نفسك بعد خمس سنين؟ اقولكم ما ادري و لا ابغى اعرف ، انا عندي أحلام و امنيات ابغى احققها يعني انا مو يأسه بس ما عدت افكر كيف و شلون و متى رح يتحققون. يعني صار عندي ايمان ان انا ادعي بشيء واتركه لله و الله هو يسيرني و يلهمني بالوقت و الطريقه المناسبه عشان احققه فيه

بمعنى لما اسعى لحلم و ما يتيسر امره ما الوم نفسي و اقول انا مقصره او ما بذلت مجهود او استسلمت لا اعرف انه مو وقته الحين اني احققه او تعسر الامر لان فيه حكمه و درس انا محتاجه اتعلمهم الحين لان بينفعوني بكره. فعشان كذا انا ما افكر بالمستقبل ايش رح يصيرلي بس اعرف انه خير بإذن الله و اتفأل بس مايهمني اني اعرف او اخطط. يعتبر مستقبل سامية مجهول بالنسبه لها ، لان هذا الامر ريحني كثير نفسياً

انتم ايش رايكم كيف تنظرون للمستقبل ؟ هل تتفقون معي ام لا؟ أتمنى انكم انبسطتوا و استمتعتوا بمحتواي اليوم ما ابغى أطول اكثر لاني اخذت راحتي بزياده ما شاء الله ههههههه

مقالات ذات صله