اقضوا معاي- يوم الخميس الونيس

،اقضوا معاي يوم من ايام الخميس في حياتي. سويت فيه فعاليات بسيطه منها. سويت تمارين الاستيقاظ، سويت عصير خضار، دكتور حب وعلاقات، حلا الطيبين، بديكير سريع، وين اختفت بديعه، اذبني بنعومه

يوجا — الساعه ٦ المغرب

تمارين الاستيقاظ

صرت أنسى أسوي تمارين التمدد بعد النوم من مده . رجعت أسويها الان ليا يومين و الحمدلله على طول احس بنشاط ماشاء الله، اليوم سويتها بعد مع أنى افضل حالا من امس الحمدلله. انا أسويها مدة خمس دقائق فقط أكثر من كذا ما أحب . المهم أحس نفسي أسوي أشياء كثيره، اكتب، اشرب قهوة، ادون او اقراء كتاب. ما اعرف ايش أسوي بالضبط. بما ان اليوم الخميس والمفروض يكون فله بس للأسف ماعندي فله أسويها غير كذا، مع اني لحد الان اتحمس لما اعرف انه الخميس كاني زي زمان لما كنت طالبه. بس لسى وضعي نفس زمان نفسي افلها بس ما ادري وين وشلون، يبغالي اخترع فعاليه لهذا اليوم ما يصير وضعي كذا طفشانه في ويكيند

كنت متحمسه من ساعه اني اسوي أشياء كثيره بس صليت العشاء واحس بخمول مو طبيعي، مادري من لما صار فيه نسمة بروده في الجو احس اني ابغى بس اتغطى في البطانيه وما اتحرك. حسيت مافيني طاقه مع اني شربت قهوه قبل شوي بس غريب طاقتي صفر بشكل مفاجئ. بحاول اغفى شوي ممكن اصحصح و اشحن طاقه شوي. مع اني حابه انجز اليوم بس أحيانا لازم نسمع لجسمنا خاصه لما يعطينا إشارات بالم او خمول ، مايصير نجاهلها هذا معناته انه محتاج يرتاح عشان يقدر يعطي اكثر

عصير خضار — الساعه ٩ ونص المساء

عصير الخضار

بعد حوالي ساعه او ساعه ونص وانا متمدده عشان انام بس ما قدرت، قررت أقوم اسوي عصير الخضار. هذا العصير اسويه لما ما اخذ كفايتي من الخضار بيومي ، ولاني اكره اقطع خضار و افضل اكلها صحيحه ولا اجلس ساعه اقطع حبه حبه ما عندي خلق وطاقه لهذا الشيء. والحين صرت اسويه بزياده لإني وقفت حبوب الشعر فشعري محتاج فيتامينات زياده. هو عباره عن كل خضار الثلاجه حرفيا، بس استبعد الفلفل الحار والبارد لان صعبه اطحنهم والبنادوره لاني أحب اكلها نيه. أحيانا احط مكسرات لزيادة الفوائد ، عين جمل، لوز، بذور اليقطين، بذور الشيا. كيف اسويه اجيب كوب مويا بارد معيار العلبه او الكوب الي بحط العصير فيه بعد الطحن. انظف الخضار، اقصصهم و بعدها احطهم في الخلاط واحط معهم كوب المويا. بعد ما اطحنهم اصفي العصير من الشوائب و احطه في العلبه الي رح ادخلها الثلاجه، يصير اشرب منه كل يوم بمقدار كاسه صغيره او فنجال شاي. هذا الكوب يكفيني لمدة ثلاث أيام لان ما عندي طاقه اسويه كل يوم. طبعا في ناس تشرب علبه كامله او كوب كامل انا عن نفسي حاولت بس ما قدرت. لكن لما جربت هذا الحل ارتحت عليه وناسبني، انا من الناس الي اتبع حدسي والشيء الي يريحني وما علي من نصايح غيري المهم انا أكون مرتاحه. طبعا وبما ان الجو متقلب وبداء يبرد لازم التزم فيه مع شاي الكركم والقرفة عشان ارفع مناعتي، بصراحه شفت نتائج جباره ماشاء الله من الشاي هذا، جاتني انفلونزا قبل شهرين وانا من الناس مرضي صعب جدا قبل. جانب منه بسبب زمان ما كنت قادره اهتم بصحتي بسبب ظروفي الخاصه، بس الحمدلله ربي ساعدني وابتدأت من بدايت السنه الهجريه اهتم بالفيتامينات واكلي والحمدالله صحتي صارت احسن بس بالإضافة صرت اشرب شاي الكركم والقرفه عشان ارفع مناعتي و وقتها ما شاء لاحظت اني تشافيت باقل من أسبوع وصحتي صارت احسن وتعبي ما كان قوي وكنت انجز ماشاء الله والحمدلله. هذا الشاهي عباره عن كركم بودره ، قرفه بودره، زنجبيل طازج او بودره، ، قرنفل، زعتر ، ليمون. احط عليهم مويا واغليهم دقايق مو كثير ، بعدها اشربه وهو حار. و بالصحه والعافيه

بعد ما جهزت العصير احس جاني نشاط اني اكتب ماشاء، خطر ببالي موضوع لما كنت قاعده على الجوال وشفت مقطع فيديو لدكتور نفسي، طبعا هو عنده قناه يتكلم عن الحب والعلاقات شفت فيديو له للنهايه ولاحظت انه يدعي بدعوه جميله وغريبه بنفس الوقت يقول “يارب الي ما حب يحب ، ويعيش بهناء وسعادة وما يكتب عليه فراق، الله يرزقني واياكم راحة البال”. طبعا اول مره اشوف احد يدعي للناس انهم يحبون هذا الي استغربته واحسه من الناس الي تحب الحب يعني مو من الناس الي عندها تشاؤوم وان ما في حب هذي الأيام ، طبعا موضوع الحب عندي مؤجل حاليا الى اجلا مسمى الين ربي يشاء و يرزقني الحب النقي ، البسيط اللطيف، الي ببالي وخيالي او استناه بالجنه ان شاء الله . طيب اما الحين انا تركيزي على راحة البال، هل فيه فعلا شيء اسمه راحة بال في هذه الدنيا؟ اذكر لما كنت في العشرين كنت احس راحة البال يعني أكون حققت امنياتي واكون مستقله ومستقره. بس من لما مريت بحالة الفقد وقتها رحت بحثت عن الدنيا والجنه، اكتشفت ان لو مهما حاولنا نرتاح ما نقدر لان الدنيا مو مكان للراحه و الهدوء نعيش فترت هدنه من المشاكل و الابتلائات بس نرجع نعاني، ونتعب ونزعل ونحزن. لان هذه الدينا للاختبار عشان نفوز بمكاننا الأخير وهو الجنه. وقتها لما عرفت وصف الناس في الجنه، انهم سعداء مبسوطين متنعمين. مافي ضيقه، حزن، اكتئاب ، مجاملات، تعب، شقاء، مرض، مكائد، غيره، حسد، تن&مر واشياء كثيره مؤذيه. حسيت وقتها ان قطعت تعلقي في الدنيا وما عدت اهتم فيها ولا في مغرياتها. واقتنعت ان مافي شيء اسمه راحة بال فيه شيء اسمه الرضا بالحال والقدر، يعني انا اصنع ابتسامتي وراحتي بأصعب الظروف ما احتاج أكون مستقله على سبيل المثال عشان أكون مرتاحة البال. الراحه والهدوء والسلام الداخلي نصنعه حنا جواتنا عشان لو تمر علينا ظروف قاسيه نكون أقوياء ونحس بطعم الدنيا

فجأة خطر ببالي اسوي حلا الطيبين نفسي فيه مع قهوه سعودي، هو عباره عن بسكوت شاي يتغمس في حليب بارد بالنسكافيه ونرصه في الصينيه ونحط مابين الطبقه والثانيه الخليط واخر شي نحط الخليط نغطيه فيه ونزينه مثل ما نبغى . انا هنا حطيت نوتيلا كنت بزين بشكل معين بس ماضبط معي الحمدلله وحطيت حبيبات الشكولاته، وحطيته في الثلاجه يجمد. ما اخذ معي وقت اقل من نص ساعه وانا مخلصه بس الي عطلني اني اطلع المقادير واكتشفت ان مافي كريم كراميل بس حطيت مكانه ظرفين دريم ويب ، طلع طعم ماشاء الله بس كنت احس لو فيه كريم كراميل رح يكون الذ واطعم

انا هذي الفتره احس فيني ارهاق جسدي مو طبيعي واحس بنهاية اليوم جسمي مكسر ورجولي الله يكرمكم احس مكسره. حبيت ادلع نفسي واسوي مساج ومنها بديكير لرجولي اجلكم الله، انا احب اخر أسبوع من كل شهر او اول أسبوع من كل شهر اسوي فيه روتين عميق لجسمي . يعني اسوي تعقيم لفروة راسي واحط ماسك ترطيب، اسوي حمام مغربي ، اشقر حواجبي، اسوي بديكير لروجلي ويدي ، وانظف بشرة وجهي تنظيف عميق . عشان يصير خلال الشهر ما اتعب بالعنايه وتكون ،خفيفه وسريعه. كيف اسوي البديكير ، انقع رجولي لمدة ١٥ دقيقه في الجهاز عشان استرخي ومنها عشان يطلع الجلد الميت بعدها بالحجر اشيل الجلد الميت. لكن وقتها احب اشغل زر الاهتزاز شوي بس ما اطول لانه صوته ما شاء الله مره مزعج . عشان كذا احب اشغل موسيقى هاديه او اسمع لكتاب صوتي، بس هذه المره قلت مارح اشغل شيء وبجلس اسرح وافكر. خطر ببالي موضوع طبعا انا في هذه اللحظات الي تجيني الافكار لمواضيعي للكتابه او اجلس اتناقش مع نفسي. المهم سألت نفسي سؤال عميق، ليش انا مو غنيه ؟ او ليش مو كلنا اغنياء ؟ يعني لو الفلوس مو زينة الحياة الدنيا وتكون بمتناول الجميع ويصير ابتلاء المال في شيء ثاني . كيف رح تكون حياتنا وكيف رح نعيش ياترى؟. طيب احكي لكم شغله صارت معي زمان لما كنت في العشرين. اذكر لما كان عندي حساب في السناب في واحد مشهور تقريبا كنت اتابعه ، هو صاحب مشروع و ماهو كبير بالعمر وقتها كان في نهاية العشرين ، المهم جلس يقول المفروض كلنا يكون عندنا مشاريع ، والي ماعنده مشروع وما يخطط انه يفتح مشروع يعتبر فاشل. طبعا وقتها كنت متخرجه من الجامعه ليا تقريبا سنتين وكنت جالسه اجتهد عشان اتوظف بس ماني قادره ، ووقتها بعد كنت ما اعرف ايش ابغى بالضبط في الحياه . عشان كذا حسيت كلامه استفزني انا ماعندي راس مال عشان افتح مشروع الي ما اعرف ايش هو وتقول عني فاشله هههه. انقهرت من كلامه وتحسست وقمت حذفته مع انه يقدم نصايح عن المشاريع مفيده بس قلت ماعلي لانه شخص سطحي وانا ما اتابع ناس كذا. طيب انا الحين بعمر الثلاثين عندي جواب ثاني عن قبل. اول شيء احنا ربي خلقنا في شخصيات وتفكير مختلف، يعني مثلا انا ابغى يكون عندي مشروع غيري مايبغى ولا يهتم انه يغير في حياته شيء وهذا عادي لان اهتماماتنا مختلفه .ثانيا لو كلنا عندنا مشاريع طيب كيف رح تكون الحياه ؟ رح تنتهي لان مافي ايدي عامله لان كلنا نبغى نكون قاده ومتحكمين ، يعني لو انا بديت مشروعي لحالي يكون صغير في البدايه صح ، لكن لو حابه اوسعه واكبره احتاج ناس تساعدني تقوم بمهامي وانا اجلس اخطط وافكر واشرف من بعيد. ثالثا مو كلنا ربي خلقنا نكون قاده وعندنا صفات القائد، الي بيفتح مشروع لازم يكون عنده صفات كثيره ومميزات بعيدا عن الماده طبعا، عشان كذا كلامه مو صحيح ولا اتفق معه و هذي وجهة نظري من كلامه الان

السنه الي فاتت كنت لما اضيق اطلع اجلس قدام البيت بهذا التوقيت، ويكون فيه قطط الحاره موجوده . احط لهم اكل واجلس عندهم شوي. في هذيك الفتره فيه قطه سميتها بديعه على بديعه بنت رياء هههه احس زيها بالضبط، تختفي وفجأه تطلع ، ماشاء الله طول الوقت جيعانه ، ودائما فيها غبار وطين . ماعلينا صرت اقرب من بديعه الين ما تعودت علي و صرت اجلسها في حظني والعب معها ، حتى حفظت اسمها لما اناديها فيه تجيني على طول . بديعه مزاجها متقلب مثل باقي القطط مره لما تشوفني تبغاني العب معاه والمسها ومره يكون مالها مزاج ماترد وتهرب. بس احسها حنونه علي وتعرف لما اكون مضايقه .فلما اجلس قدام البيت في هذا الوقت تكون متواجده اكثر شيء فتجلس على رجلي وامسح على راسها وهي تخرخر وتعض اصابعي بلطف عشان ما توجعني. كنت اتمنى لو اقدر اتبناها واهتم فيها كنت احس ماهي قطه احسها بشر كانت تحس فيني و تفهمني لما اكون ضايقه ، واتعمد اروح ادورها لما اكون بذا المود وتظل جنبي الين ما اكون احسن. احس وجودها كان فيه حنيه و طبطبه على نفسي وقلبي كإن الله ارسلها لي بفتره معينه عشان تساعدني بوجودها في ذاك التوقيت. فعلا كنت احس انها عافيه لقلبي بدون مبالغه ، اجمل شيء بالدنيا لما قط يحبك ويثق فيك لان عندهم شخصيه واستقلال عكس باقي الحيوانات. قراءت معلومه مره ان القطط تشيل الطاقه السلبيه من البشر وتجلب السعاده عشان كذا كنت احس بالراحه والانشراح لما العب معاها و المسها . لكن للاسف بديعه صار لها من عيد الاضحى تقريبا مختفيه ومادري وين راحت مره اشتقت لها دورت عليها في كل مكان حتى في الشارع والحاره الي جنبنا بس مالها اثر ، اتمنى تكون بخير واطلع بيوم واحصلها في الشارع

طبعا بما ان النوم عندي مايجي بسرعه صرت اجلس اتابع فيديوهات و مسلسلات قبل النوم. فيه مسلسل كوري قاعده اتابعه بس ماشي حاله مو سيء. اسمه اذبني بنعومه هو مسلسل رومانسي . ما احس اني متحمسه اتابعه مثل مسلسل تزوجي زوجي كان مره حماس واستنى الحلقات تنزل بسرعه. انا مو مع المسلسلات الكوريه مره بس اكثر مسلسل حبيته كثير هو مسلسل جوهرة القصر وعادي عندي ارجع اشوفه مره ثانيه . لانه يذكرني بزمان لما نزل اول مره كان مره حلو، وكنت اتحمس . للاحداث. احب شخصية جونجوم وحده عندها اصرار انها تاخذ حقها وتتعلم ومحافظه على اخلاقها ومبادئها . انا احب الشخصيات هذي حتى في الواقع ، انا انجذب للناس الي تكون واضحه، صادقه، محترمه، ويكون عندهم اهداف في الحياه، و ما يضرون غيرهم. انا مواضيعي ماتخلص ما شاء الله لو اجلس لليوم الثاني مارح اوقف كتابه ما شاء الله ههههههههه . خلاص بوقف هنا واكمل سوالف معكم بيوم ثاني بأذن الله

مقالات ذات صله