لحظات عشوائيه في اسبوعي-قصص و توتر

لحظات عشوائيه في حياتي

 

السبت


بارنز كافيه

الساعه ٩ المساء

بارنز كافيه

صحيت و انا مالي نفس اسوي شيء و لسى عندي ارهاق جسدي و احس اليوم الامر زايد الحمدلله على كل حال. بس الحمدلله سويت تمارين التمدد وارتحت كثير، بس احس بطفش و ابغى اطلع و خطر ببالي بارنز كافيه توهم فاتحين فرع جديد عندنا و فيه جلسات و اطلاله على الشارع. حبيت اليوم اروح له واغير جو، صراحه مره المقهى يجنن ما شاء الله، مريح و الإطلالة حلوه ما شاء الله. و انا داخله شفت اكواب مكتوب عليها الابراج و لقيت كوب مكتوب عليه برجي بس انا زعلانه منكم يا بارنز ليش لون الكوب ابيض ليش مو اسود او اخضر، لاني شفت الاكواب السوداء و الخضراء مكتوب عليها بعض الأبراج فا تمتنيت لو كوب برجي بأحد هذه الالوان. ان شاء الله اروح المره الجايه و احصل الكوب بالون الي ابغى اوكي يا بارنز ههههه

 

الاحد


ظبية البان

الساعه ٨ المساء

الطبعه اتمسحت

مقهوره الطبعه اتمسحت غير لازم اغيرها، كنت احسبها اصليه و رح تثبت بس خاب املي مع ان شكلهم كيوت مره ما شاء الله. جبتهم من مقهى اسمه ظبية البان مره بعيد عني هو من الأماكن الي اروح لها مره بحياتي ولا تتكرر بسبب المسافه فقط

مقهى ظبية البان

المكان تحفه و اول شيء عجبني الستيكرز مره كيوت ما شاء الله و جلست اصورها من عند الباب

ولما دخلت الديكور مره عجبني بس كنت مركزه أكثر شيء على الطوابع يجننون ما شاء الله وقتها كنت متحمسة اصور مع ان مو بعادتي لما اروح كوفي اصور، خلصت تصوير و اكتشفت ان الموظف قاعد يراقبني و قام اعطاني الطبعات و قالي صوريها. انا فرحت مره بس بنفس الوقت خجلت قلت فشله الحين يقول بنفسه هذه عمرها ما شافت طوابع بحياتها هههههه. المهم بعدها اكتشفت ان الاستيكرز يعطونها مجانا للزبائن يعني افتشلت على الفاضي هههههه

بكل صراحه المكان، الموظفين ، القهوة و كل شيء في هذا المقهى ممتاز ما شاء الله ربي يباركلهم في رزقهم و أتمنى يفتحون فرع في حينا عشان أكون زبونتهم بإذن الله

 

الاثنين




كيك المخبوزات

الساعه ٩ ونص المساء

كيكة التوتر

سويت كيكه لإني متوتره و لإني نهيت و بدأت يومي غلط و ابغى اشتت انتباهي من الي قاعد يصير معي الحين. أحس إني كٌتلت طاقة سلبيه ماشيه اعوذ بالله من الشيطان الرجيم. المهم هذه الكيكة نفسي فيها من أسبوع كذا بس الأسبوع الي فات كنت مره تعبانة جسديا فعشان كذا ما قدرت أسويها. شوفوا حنا صرنا أصحاب و قرايب و معارف و اهل و كل شيء هههه فاتعودتوا علي اني ما اعرف اقطع كيك زي الناس هههه يعني تجاهلوا شكل القطعه في الصحن تمام هههه. طيب انا بالعاده ما احب احط صوص على الكيكه لاني احبها ساده بس اليوم حابه احط صوص من فوق و مو أي صوص. ما اقدر اوصف لكم قد ايش طعم ، لذيذ ، بسيط و ماياخذ وقت. جيبي ملعقة زبدة فول سوداني مع ملعقة نوتيلا او شوكلاته حبيبات او بار ذوبيهم في المايكرويف لثواني فقط بعدها اخلطيهم و حطي الصوص فوق الكيك و ذوقي الطعم التحفه. تحسين انك تاكلي سنيكرس خليط رائع ، طبعا انا خلطتهم مع بعض بدون ما ادخلهم المايكرويف عشان كذا الشكل ما كان لطيف ابدا و ما صورته هههههه

 

التنفس التفريغي

الساعه ١٠ المساء

التنفس التفريغي

على ما تستوي الكيكه بسوي تنفس تفريغي لإني وصلت حدي من التعب النفسي و الطاقه السلبيه. بصراحة اليوم في أشياء كثيره غلط صارت لي عشان كذا انا ماني بخير نفسيا. اول شيء نمت وانا كنت متضايقة ، ثانيا صحيت بعد نومي بأربع ساعات على اتصال لما رديت حسبته الشغلة الي استناها طلع لا وحده من شركة توصيل غلطانه و ما قدرت انام بعدها الا على العصر و ما ارتحت بالنومة لان احس عقلي واعي يعني ما اعتبر نائمه. ثالثا اول ما صحيت سمعت خبر سيء قلت كملت و حسيت ماني قادره اتحرك من مكاني.  و أصلا اول ما صحيت وقفت على طول يعني ما اخذت وقتي اني استوعب الدنيا. رابعا ما سويت تمارين التمدد، يعني كل هذا تراكم علي و حسيت إني رح انفجر. فارح أسوي تمارين التنفس، هذه المرة ابغى أسوي التنفس التفريغي سمعت عنه من مده وما جربته للأمانة. بحثت عنه و طلعت لي طريقة الدكتور إبراهيم الفقي (رحمة الله عليه) و سويتها. بعد ما خلصت اول شيء حسيت بإجهاد و دوخه بسيطة ، فحاولت بعدها اني اتمدد لإني سويتها و انا جالسه. بعدها بثواني حسيت براحه كبيره ما شاء الله وان الدم قاعد يمشي براسي، ورئتي توسعت و صار فيها كمية هواء كبيره ما شاء الله و الطاقة السلبية طلعت مني و أحس كل شيء صار لي ، ضايقني اختفى مع التنفس الي سويته. حسيت ان فيني طاقة و نشاط ما شاء الله و نفسي أقوم انجز و كل شيء سلبي تخطيته و نسيت امره. احاسيس جميله و غريبه صراحه تمرين مره حلو انصحكم فيه عشان تفرغون الطاقه السلبيه الي جواتكم

 

 

الثلاثاء

 

فوبيا الطفوله

الساعه ١١ المساء

فوبيا منذ الطفوله

 

الجو دافي اليوم أتمنى ما يبرد اكثر لان عندي أشياء كثيره انجزها.  من ضمنها ان اكتب محتوى للموقع بس أحس بنعاس بس ما فيني نوم. فكرت إني اغير المكان عشان اصحصح و جاء ببالي اروح اجلس في المطبخ و فعلا رحت بس لما دخلت ولا اشوف وزغ في الشباك من براء ما قدرت اتحمل شوفته و طلعت. صحيح الجو مو بارد مره بس فيه نسمت هواء ما اعرف انهم يطلعون في الشتاء؟ شيء غريب صراحه. المهم تصدقون انو انا عندي فوبيا من الوزغ لدرجة إني ما اتحمل اشوفه او أقرب منه ما اقدر احس كأني بموت او رح يصيري لي شيء. كيف بداءة الفوبيا لما كنت صغيره، بيوم رحت انا،اخواتي وقريباتي للحوش نلعب في الليل. كنت جالسه العب و قمت حركت طوبه مكسورة من النص، ولما حركتها طلع فيها وزغ صغير مشي على يدي . رميت الطوبة بسرعه وبعدته عن يدي و كل شيء تمام رحت اجلكم الله دورة المياه اغسل يدي على ان الامر تافه و انتهى الموضوع. انا اصلا ما كنت أخاف من هذا الكائن يعني ما يهمني. بعد ما غسلت يدي رحت قلت لأهلي الي صار ، كنت اضحك من الموقف على انه شيء طريف، بس الي جرى انهم خوفوني الي قالي يدك رح يجيها مرض ولي يقولي جلدك رح يتغير لونه مثله ولي يقولي رح يجيك مرض خبيث و تموتين.انا هنا صرت أرجف و اصيح رحت لدورة المياه تكرمون مره ثانيه و جلست اغسل يدي بكل مواد التنظيف عشان اتفادى المرض و من يومها صار عندي فوبيا منه و صرت اذا شفته احلم فيه بالليل وصلت لهذه الحاله من الرعب

 

الأربعاء

موقف محرج

الساعه ١٢ الصباح

موقف محرج في الجامعه

 

كنت طفشانه و جات طلعه مفاجأة لأختي فقلت فرصه اروح معها اغير جو. راحت مشاويرها و بالصدفة شفت اعلان الطازج في الشارع تذكرت ان نفسي فيه من فتره طويله بس ما عندي احد يجيب لي إياه. خليتها توديني هناك ممكن تتوقعون إني رح اطلب أشياء كثيره ؟ لا طلبت كرسبي رول ساندويش نفسي بنقانق بس للأسف كان مخلص فاطلبت دجاج. طعمها خرافه لما تكونين نفسك بأكله و تكلينها الإحساس يكون لا يوصف. خليني احكي لكم موقف محرج نوعا هههه اول شهر سكنت فيه بالمدينة وقتها كنت جالسه مع زميلاتي في الجامعة و كلهم من هنا بس انا الوحيده الي مختلفة عنهم. وقتها كنا جالسين نتناقش عن مهام نسويها اوكلتها لنا الدكتورة بعد ما خلصنا قالوا ايش رأيكم نطلب من براء و كل وحده فيهم بداءت تقترح مطعم المشكلة انهم كانوا يقولون اختصارات المطاعم يعني دجاج كنتاكي كانوا يقولون كي اف سي ، ماكدونالد ماك. في وحده فيهم قالت انا نفسي بماك ايش رأيكم نطلب منه. انا هنا حسيت بأحراج كبير ايش هذا ماك ما اعرفه، و عشان افك نفسي من الاحراج قلت لهم لا انا ما ابغى عشان أخاف يسألوني و يكتشفون اني ما قد جربته او اذا سألتهم عنه يضحكون علي ههههههههه ياعمري يا انا . و جلست اتسأل ايش هو ماك هذا و رحت وقتها ممكن بحثت بقوقل او سألت اختي ما اذكر بالضبط. طبعا الي ما يعرف انا ولدت و تربية في محافظه صغيره قريب من المدينة و ماكنت اجي للمدينة الا للضرورة لساعات و ارجع لديرتي. و عندنا هناك ما في أشياء كثيره مثل مطاعم، كوفيات، مولات و حدائق بس الحمدالله الحين الوضع اختلف. بس قبل ما كان عندي اطلاع حرفيا على العالم و ايش يصير في المدن الكبيرة و الناس كيف عايشه. كنت اعتمد على المعلومات الي يقولولي اياها زميلاتي بالمدرسة. طبعا قبل ما يصير امر السفر للخارج موضة زي الان. فكانوا يسافرون للداخل، للرياض، جده، مكة، تبوك و الجنوب كل اجازه ولما نرجع للمدرسة يحكون لي ايش سووا هناك. بس طبعا الحين الوضع اختلف يعني ما عندي مشكله اسأل اذا ما كنت عارفه معلومه سبحان الله كيف تغيرت شخصيتي. اتمنى سواليفي اعجبتكم لسى عندي كثير ماشاء الله لا تقلقون هههههه بس رح اكمل معكم ان شاء الله بيوم اخر  

 

 

Previous
Previous

كيف اوفر فلوسي

Next
Next

جاوبة على اسئلة قوقل الاكثر شيوعاً عن عمر الثلاثين(٢)