لحظات عشوائيه بحياتي- مشاعر وخواطر



الساعه ٧ المساء

يومي الخاص

هذي الفتره صاير يومي الخاص متغير ، لاني احب التغيير والتجديد. زمان كنت احب اقضيه في كوفي معين بعدها مليت وصرت اطلع اجلس في السياره وبعدها طفشت صرت اروح لمكان قريب عند البيت عنده اشجار عشان اتنفس هواء نقي واتذكر ايام الطفوله. اليوم حبيت اقضيه في الممشى محتاجه اجلس مع الطبيعه واتفرج على الناس حتى لو ما اختلط فيهم . انا صحيح شخص احب الهدؤ و اكره الصخب لكن ساعات نفسي اكون وسطه عشان احس اني عايشه في هذه الدنيا واني بالواقع مو الحلم. خاصه الايام الي احس فيها اني جلست في البيت كثير وقاعده اعيد نفس الروتين. ابغى اطلع اشوف الناس كيف عايشين وكيف مقضين يومهم ، واحس بتعجب بوقتها من اي حركه يسوونها كاني جايه من مكان معزول صار لي سنين . مثلا قبل شوي شفت قطه قاعده تاكل عشب منظر غريب علي حتى القطط صاروا نباتيين ههههههههه. انا بالعاده احط اكل قطط في شنطتي تحسب احصل بسه جيعانه خاصه اذا جيت هذا المكان ، طلعت لها الاكل وحطيته قريب منها عشان تاكله لكن رفضت وكملت تاكل العشب شيء غريب صراحه



الساعه ١٢ الصباح

قصتي مع الفلسلفه

رحت من فتره للمكتبه لكن هذي المره ما عندي كتاب معين في بالي لكن عندي فئة كتب معينه حابه اقرائها ولي هيا شعر، روايه عربيه ، وفلسفه. اشتريت كتاب لجبران خليل جبران فيه مجموعة كتابات ومن ضمنها الشعر، والروايه لنجيب محفوظ الحمدلله توفقت بالكتابين هذول لكن الفلسفه اول ما فتحت الكتاب حسيت بصدمه. فالبدايه انا كنت ابغى اقراء لفيلسوف انجليزي رحت في المكتبه لقسم اللغه الانجليزيه بس ماعرفت وين مكانها بالضبط وماعندي وقت اسأل فرحت اخذت هذا الكتاب من قسم اللغه العربيه. انا عندي مشكله مع المترجمين عشان كذا احب اقراء الكتاب بلغة الكاتب لاني ما اعرف هل المترجم صايغ الكلام صح او لا. المهم جلست اقراء الكتاب احس ماني فاهمه شيء واقول في نفسي يمكن هذي الفلسفه كملي قراءه ، كل ما كملت احس في شيء غلط . جلست ادقق لاحظت انه فيه اخطاء املائيه كثير هذا اول سبب ثانيا اكتشفت ان الترجمه حرفيه عشان كذا ماهي مفهومه . يعني مثلا كان يتكلم عن نفسه بسطر من الاسطر بعدها في نهايته مكتوب حتى جدتي تفعل ذالك ! لحظه ايش دخل جدتك ههههههههه. فجلست ادقق اكثر حسيت اني قاعده اجاهد والكلام مو صحيح فقررت احط الكتاب على جنب وما اتعب نفسي واحس بقهر اني اشتريت الكتاب ونفسي اروح للمكتبه وارجعه بس الحمدلله انه مو غالي ولا كان انقهرت اكثر.



الساعه ٨ المساء

صراعات الحياه


دائما لما اطلع واجلس في مكان عام احب اتفرج على الناس واتسأل ياترى ايش معناتهم وايش الي يحسون فيه وكيف قادرين يتعايشون مع المعاناة. زمان لما كنت صغيره كانت عندي صديقه من اول ابتدائي كنا نتكلم مع بعض ونفضفض عن حياتنا بكل ارياحيه وكنا نجلس على التلفون الارضي لساعات نتكلم عن يومنا وايش صارلنا من مشاكل. وصلنا لمرحله اننا نفهم بعض من نظره مايحتاج وحده فينا تتكلم او تعبر، تخرجنا من الثانوي كل وحده فينا راحت في طريق مختلف عن الثانيه ومن يومها كنت احس بفراغ بصراحه نفسي يكون عندي صديقه كذا وهذا الشيء كان تاعبني فترة العشرين. لكن لما دخلت الثلاثين حسيت اني بحاجة نفسي بحاجه اقوي علاقتي بنفسي، انا اقدر اسمع نفسي واساعدها واوقف جنبها ليه ؟ لان انا الوحيده الي تعرف معدنها وايش هي قاعده تحس فيه وايش هي مرت فيه وايش هي تحب وايش هي تكره. احيانا نمر بظروف صعبه جدا لدرجة ان نحس ان قلوبنا رح توقف من الالم نبغى فترت راحه بس نشم نفسنا بس مانقدر لازم نجاهد ونتعب لان الفرج ممكن يكون بعد ساعه او حتى ثانيه. وقت المحنه ممكن نمر بلحظات صادمه مع اشخاص بيوم من الايام تكونين حاطه ببالك انه هذا الشخص اكيد يحبني ويقدرني ورح يوقف جنبي وقت المحن ، هذا الشخص اكيد قلبه حنين ورح يحن علي اذا طلبت منه المساعده او حتى تكلمت معه. بس للاسف يطلع هذا الشخص هو اول واحد يتنكر لك ويطعنك بالخلف وممكن يسعى لاذيتك اكثر. عشان كذا هذا درس لي ولك ان مافي امان لبشر او اي شيء في هذي الدنيا غير الله ثم نفسك. ضروري ولازم تقوين علاقتك بنفسك وتدعمينها هذا اجباري والزامي. انتي لازم تكونين بخير لان ماحد يستاهل انك تضيعين وقتك وطاقتك عشانه غيرك. انا لما احس اني قاعده اصارع بحياتي واحس اني على حافة الانهيار احب اسوي هذي الخطوات:

www.samiaali.com

١- اقول لنفسي كلام ايجابي ، قد ايش انا قويه، قدا ايش انا تخطيت الصعب، قد ايش عندي اراده ، واي شيء قاعد يصير الحين هين وينحل قريب باذن الله

٢-اسوي الشيء الي احبه ، اشوف مسلسل ، اسمع موسيقى، اقراء

٣- ابعد عن الناس السلبية واي شي رح يزيد حالتي سوء

٤- احمد الله على ما انا فيه ممكن يكون هذا الابتلاء اقوى بس الله خففه علي رحمه فيني

٥-بكل محنه فيه حكمه من الله ممكن ربي يبغاني اتنور واتفتح واتعلم وممكن راد عني مصيبه كنت احسبها خير

٦-اذكر انجازاتي ايش سويت انا طول هذي السنين

٧-اركز على الايجابيات بيومي وحياتي بشكل عام عشان ما استسلم للسلبيه

www.samiaali.com

٨-احب احط كلام ايجابي على شاشة الجوال واللاب توب، كلام مناسب للفتره الي امر فيها عشان يدعمني ويقويني

٩-هذي الظروف صح صعبه بس بفضل الله انا قادره اني اتجاوزها

١٠-الايقان و الايمان بالله انه قادر على كل شيء وماهو عاجز انه يحل مشكلتك بثانيه بس لازم نتعب ونصبر، اذكر نفسي بالصبر ان الله مع الصابرين وبشر الصابرين

١١- بيوم من الايام رجعت للبيت وكان القران شغال وقتها كنت بهم كبير وفجأه سمعت هذي الايه ومن يومها اذكر نفسي فيها لما اضيق (فَعَسَى أَنْ تَكْرَهُوا شَيْئًا وَيَجْعَلَ اللَّهُ فِيهِ خَيْرًا كَثِيرًا



www.samiaali.com.happinesproject

الساعه ١ الصباح

البحث عن السعاده

بما اني لسى ماعلقت الرف جلست اشوف الكتب الي عندي وبما ان ايضا كتاب الفلسفه مخيب للامال قلت خليني اشوف كتاب اقراه. فجأه طلع لي هذا الكتاب ، حسيت انه هذا الوقت المناسب اني اقراه ، اشتريت هذا الكتاب من سبع او ثمن سنين. وقتها كنت امر بحالة اكتئاب فضيعه فرحت للمكتبه عشان احصلي كتب تساعدني اتخطى ذيك الفتره ، لقيت هذا الكتاب واشتريته صراحه وقتها ما فادني مع انه يتكلم عن الخطوات العمليه عشان نكون سعداء بس حسيت حياة الكاتبه ماهي منطبقه علي او ما حسيت ان الكتاب رح يساعدني وقتها. لكن لما قرأته الان حسيت انه ممتع وان في تشابه بيني وبينها من ناحيه واحده فقط انها ماهي مكتأبه بس ماهي قادره تستمتع بالنعم الي عندها. فيه فراغ ناقص جواتنا جزء المتعه غايب ايش ممكن يكون السبب هل لاننا كبرنا وشفنا الدنيا على حقيقتها و انصدمنا من الواقع او مشاغل الدنيا وهمومها خلتنا ننسى جزء الانبساط. ما اعرف بس اعرف شيء او تعلمت شيء ان كل فترت تعب بتمر وتنتهي لو مهما طولت واحيانا نشتاق للايام هذي لان مو كلها يكون تعب وحزن فيه جزء جميل ممكن روتين كنا نسويه وقتها ، مسلسل كنا نتابعه ومتعنا ، مكان كنا نروح له ويسعدنا او لحظات عفويه مع احد. عشان كذا تعلمت حتى لما يكون عندي ارهاق من روتيني اليومي او اكون تعبانه نفسيا او عندي مشكله اركز على الاشياء الحلوه بيومي مثلا اني اجلس واكتب واشرب قهوه هذا يعتبر جزء من الاشياء الي تظل في بالي حتى مع مرور المحنه يكون الروتين له نكهه .




الساعه ٣ الصباح

ايش قصة مزاجي هاليومين؟

مزاجي متقلب هالايام او هذا الشهر لاني نفسي اكسر الروتين ، انا من الناس الي ادعم فكرة السعاده على حسب امكانياتي. يعني ما احرم نفسي من البسطه عشان ماعندي شغله معينه , اطلع اي شيء من الموجود قدامي واخليه يبسطني . مثلا هذي اللعبه رحت محل وشفتها جلست العب فيها وجلست اضحك اشتريتها وصرت اطلعها من بين فتره وفتره والعب فيها وانبسط. لكن احيانا احس اني طفشانه نفسيا وملانه نفسي يكون عندي سياره واطلع اتمشى باي وقت يعجبني اروح مثلا للحديقه اجلس اسوي لنفسي فعاليه ، يعني ما استنى لين اطلب سياره او استنى احد يوديني. يعني نفسي اروح الفجر الحديقه اجلس هناك للشروق اعيش جوي او يكون عندي مبلغ اروح اسافر واغير من نفسيتي و اشوف ثقافات جديده. احب اكتشف اشياء جديده واتعرف على ثقافات مختلفه عني ، مثلا اليوم الخميس نفسي اطلع واتونس ما ابغى اجلس فس البيت بس ما اقدر لان ماعندي سياره او بخاطري اسافر ينبع اروح اجلس على البحر واشم ريحته. تعودت كل بداية سنه هجريه اروح هناك كم يوم لكن هذي السنه الله ما قدر لي اني اسافر عشان كذا احس بثقل بقلبي ونفسيتي وتعب من الروتين اليومي. بس جالسه افكر اني اسوي لي نشاطات لنفسي لمده اسبوع او اسبوعين مثلا كل يوم اسوي شيء يونسني ، عشان اتحمس و اشتاق للروتين

 

www.samiaali.com

الساعه ٧ المساء

قصة مدرسة اللغه الانجليزيه

في مدرسة لغه انجليزيه كبيره بالعمر كنت اتابعها من فتره كبيره على موقع ما من لما بداءت اتعلم انجليزي. وكانت مهتمه بالاشعار وتاريخ اللغه الانجليزيه. فجأه اليوم نزلوا خبر في قناتها انها ماتت من بداية السنه الميلاديه مع انهم كانوا ينزلون لها محتوى طوال هذي المده ولا احد فينا شك في شيء. الي عجبني ان زملائها سوولها نعي من نوع خاص سوولها فيديو عن حياتها وخلونا نعرف جزء من حياتها الشخصيه. هي من مواليد الخمسينات وكانت من هي صغيره تحب الفن والغناء ، فا لما تخرجت من الثانوي قالت لاهلها انها تبغى تدرس موسيقى أهلها رفضوا رفض تام ، فا سمعت كلام أهلها ودرست سكرتاريه ولكن حبها للفن لسى بداخلها فا كانت تأخذ دورات موسيقى وهي تدرس في الجامعه. بعد مرور سنين قدرت تحقق حلمها انها تغني وتمثل على المسرح. فا بيوم من الأيام شافت اعلان عن وظيفه في مجال التأليف الموسيقي راحت لتجارب الأداء فا انقبلت في الوظيفه ، ومن هناك قابلت زوجها هذي بعض من كلمات الاغنيه الي غنتها وقت تجربة الأداء وعجبتني.

Just yesterday morning

They told me you were gone.

Oh, honey, the thing they did

Put an end to you.

I woke up this morning.

I wrote down this song.

Just can’t remember who to send it to.

I’ve seen fire.

I’ve seen rain

I’ve seen sunny days

I thought would never end

I’ve seen lonely times

When I could not find one friend.

But I always thought I’d see you again.

I always thought I’d see you again.

I always thought I’d see again.

Previous
Previous

اقتراحاتي لكتب تطوير الذات

Next
Next

Random topic in my diary- burnout