اقضوا معي أسبوع من الاحتفال

بداية شهر شعبان كملت سنتان من نشر التدوينات، لذلك حبيت اني اكافئ نفسي و اسوي الأشياء الي احبها و اشتري لنفسي هديه. اول شيء فكرت فيه اني اجلس اكتب هذه الأشياء بس احترت ايش اكتب عنوان البحث ، قائمة الأشياء الي احبها ؟ حسيت العنوان مره طويل فارحت بحثت في قوقل و عرفت ان في شيء اسمه منيو الدوبامين، يعني تسوين قائمه بالاشياء الي ترفع عندك هرمون الدوبامين وهو هرمون السعاده. حسيت انها فكره حلوه و حبيت اسويها لنفسي لمدة أسبوع كمكافئه على مجهودي في الموقع طوال السنين الي عدت

قائمة الدوبامين

هذا مو صعب علي اني اكتبه لاني اعرف ايش بالضبط الي يسعدني و يخليني مبسوطه . فهذي هي قائمة السعاده بالنسبه لي. بس حبيت اني ما اضغط نفسي و اسويهم مره وحده لا حطيت كل وحده فيهم بيوم ، و فكرت اني اصحى من النوم و اسوي اي وحده فيهم بدون تخطيط مسبق يحق لي ادلع نفسي صح ههههه

اليوم الاول

الهديه

طبعا شخص انجز لازم يحصل على هديه مقابل إنجازه صح! عشان كذا قررت اني اهدي نفسي. جلست افكر انا ايش ابغى بالضبط لاني احب اجيب لنفسي شيء احتاجه يعني مو هديه وبس . فافكرت اجيب لي كتب، و حبوب فيتامينات للبشره و الشعر حسيت هم اكثر شيء نفسي فيهم حاليا. الحبوب ما اقدر اصورها لكم اعتذر . اما الكتب نفسي بفئة كتب معينه الي هي رومانسيه، رحت اون لاين و بحثت طلع لي كذا كتاب احترت صراحه بس شفت ثلاث كتب و اشتريتهم. اثنين منهم جزئين قلت اشتري اثنينهم و لا اشتري واحد و اجلس افكر بالجزء الثاني بعدين

you've reached sam — رواية تواصلت مع سام

هذا الكتاب قاعده اقراءه حالياً رح اكتب لكم مختصر الي قرأته ، يحكي عن فتاه اسمها جولي مات حبيبها سام ( لحد الان ما اعرف كيف مات). الي صار بعد مرور أسبوع من وفاته قررت انها ترمي اغراضه و تحذف رقمه من جوالها ، بعد ماسوت كذا راحت تمشي بالشارع و صارت تتذكره بكل زاويه في المدينه. التقت في قريبته في كافي و اعطتها كتيب جامعي خلصت من موعدها و راحت لبحيرة متعوده هي و سام يروحون لها.هناك جلست تتصفح الكتيب الي اعطتها اياه قريبته و فجأه تلاقي رساله بخط يده فيه انهارت من البكاء لما قرأتها و صارت تركض بالشارع في المطر و خطر ببالها انها تتصل على رقمه. و اتصلت و بعد مارن كذا مره، صارت الصدمه انه رد عليها . خلاص كفايه حرق ههههه رح اكمل ان شاء الله وقت ثاني عشان تتحمسون

روايات خياليه — روايتين خياليه

اما هذولا لسى ما قريتهم بس شفت التعليقات عنهم اون لاين يقولون انها تشوق ، ما ادري اقراها و اقولكم رايي بإذن الله

اليوم الثاني

انا ليا مده طويله نفسي ابداء بموضوع تزيين الكيك بس بكل امانه مافضيت نفسي عشان اركز على هذا الامر لذلك حبيت اني ابداء اليوم مع كيكة التوت. يعني حابه ازينها تزيين خفيف كذا على قدي عشان اتحمس اسوي تزيين كيك بشكل ثاني. بكل امانه ماجات مثل ما تخيلتها بس بدايه كويسه صراحه

صور كيك التوت — طريقة الزينه

الزينه عباره عن سكر بودره ثلث كوب وحطيت عليها ملعقه كبيره عصير ليمون ، و جبت عشر حبات توت ازرق و عصرتهم في مصفاة الشاي و حطيتهم على السكر عشان يجي لونه كذا

بعدها زينت الكيكه بقطع من الليمون، التوت و النعناع. طبعا خبزتها بالليل و اول ما صحيت على ٦ المغرب سويت الزينه حسيت الكيكه طعمها مثل تشيز كيك التوت يعني كاني حاطه فيها جبن كريمي مع اني مو حاطه . كانت لينه جدا ماشاء و طعمها غني بنكهة التوت. مع العلم وصفت الكيكه هذي سويتها من قبل و صورتها لكم بس هذي المره الطعم اختلف ما ادري ليه سبحان الله

اليوم الثالث

قررت بما اني مارح انشر محتوى لمدة أسبوع يعني عندي فراغ بوقتي فقلت ضروري استغل الفرصه و اطلع ماشاء الله بكل مكان هههه . لقيته في ساحة الحرم و جلست اصوره وهو جالس ينظف نفسه واضح من اذنه اني طفشته وهو يستحم مثل مايقولون هههههه اسفه بس ايش اسوي انت كيوت ماشاء الله ما اقدر ما اصورك

صار موقف طريف و انا داخله الحرم ، و انا ماشيه في طفل صغير اسمه محمد ماشاء الله كيوت مره يا قلبي عليه يادوب يمشي واضح توه متعلم المشي. المهم يا حبيبي مبسوط انه بداء يخطي و يحاول يجري عشان يهرب من امه و اخته يحسب انه قاعد يقطع مسافه وهو ياعيني يادوب يخطي خطوه وحده ههههه . يبغي يهرب منهم باي طريقه و المشكلة يمشي خطوه و الثانيه و يطيح و اخته تقوله محمد وقف لا تمشي وهو يعاند غير هي تساعده يوقف ههههه يعني حتى الوقوف ما تعرف توقف لحالك و تحاول تهرب منها ليه ياعمري ههههه رحت مشيت وهو لسى مصر على خطة الهروب من امه و اخته هههه

اليوم الرابع

ضروري اشرب قهوه لانها تسبب لي السعاده عشان كذا مارح ادقق بالكميه الي اشربها هذا الأسبوع. هذا المشروب من المذاق المغربي انا كنت احبه من فرع معين بس مره بعيد عن البيت ، فاجربته بهذا الفرع بس ماعجبني يعني بالبدايه كان طعم بس بعدها حسيت ان كله سكر. اسمه وايت موكا شيكن

سويت قهوه تركي قلت خليني اتبع التعليمات الي تقول حطي مويا مغلي في الكنكه و حطي عليها القهوه حركيها بالملعقه بعدها حطيها على النار تغلي اول غلوه ارفعيها، رجعيها على النار تغلي ثاني غلوه وشيليها. حطي سكر اذا تبغين بعدها و اشربيها بالهناء هذي من عندي هههههه انا حطيتها على النار ادفقت او اندلقت او انكبت ما ادري ايش تسمونها بلهجتكم . المهم ادفقت على طول والله بس ثانيه رحت اطلع فنجال ماطولت انقهرت راح الوجه، وحطيتها للمره الثانيه و اندفقت و انا اشيلها من على النار. انقهرت اكثر و زعلت عليها فعشان كذا شكلها حزين لانها مرت بلحظات صعبه هههههه ايش أقول اكثر من كذا

شفت طريقة قهوه من وحده امريكيه اتابعها - خطواتها اني احط ملعقة قرفه صغيره مع سكر و قهوه و احط عليهم شويت حليب و اسوي رغوه. بعدها اضيف كميت الحليب كامل. انا ضفت شويت فانيلا بودر وقللت كميت القرفه مع اني احبها بس ما ابغى طعمها يكون قوي. بكل امانه ماشي حالها ما عجبتني بس حسيت ان لازم لي منكه اقوى فعشان كذا حطيت من سيرب الزعفران، شكله ماشاء الله جميل فيه خيوط زعفران جواته . نكهته مو قويه مره بس اعجبني غير الطعم

اليوم الخامس

ليا سنتين او اكثر ما طلبت من هذا المطعم و نفسي في بيتزا معينه من عندهم بس لما وصلتني خاب املي ماطلعت مثل ما ابغى و الصوص الي طالبتها عشانه ماهم حاطينه انا مقهوره مره حتى ما اقدر اشتكي للمطعم لاني طالبه عن طريق تطبيق ثاني. و التطبيق مسوين تحديث جديد ما اقدر اقدم شكوه على الطلبات، مغبونه مره حرام نفسي فيها من مده طويله بالاخر يصير معي كذا اصيح بزاويه انا

انا احب الايس كريم خاصه لو مانجو بس المكان الي رحت له ماعنده ، فحبيت اغير و اخذت توت، صراحه طعم مو بطال . نفسي أصلا بايس كريم من مكان ثاني ،احب عندهم هناك ايس كريم التوفي بس لازم اروح له بسياره للأسف فعشان كذا رضيت بالموجود خلاص

اليوم السادس

من الأشياء الي تبسطني المسلسلات القديمه ، خاصه اذا كانت بوليسيه . هذا المسلسل سوري طلع لي بالاقتراح قلت خليني اتابعه بطولة - طلحت حمدي، نادين و عارف الطويل. قصته انه امراءه غنيه تقوم بدعوة ٨ اشخاص على جزيره نائيه بهدف الاستجمام، وجميع المدعوين مالهم أي علاقه فيها او حتى التقوا فيها بحياتهم. بعد وصولهم للجزيره ، شافوا ان فيه تماثيل في صالة الفله و عددها ٨ و في غرفة كل واحد فيهم فيه رساله مكتوب فيها قصة قصيره عن أطفال صغار. بعدها بيوم بدأت تصير جرائم ق*تل ما بينهم الثمانيه و انتبهو ان مع كل جريمة يختفي تمثال من التماثيل. وصار هدفهم الان انهم يعرفون من هو القاتل الي ما بينهم و ايش هدفه، و الكل صار يشك ببعض و مافي امان و لا حتى مخرج من الجزيرة

المسلسل حلو وفكرته حلوه لكن الي زعجني الموسيقى كانت عاليه جدا و اكثر من الحوار. و في شيء ثاني ازعجني مره الي هو التعليقات . الي صار اني نزلت اشوف التعليقات في اول حلقه و لقيت واحد كاتب مين المجرم حسيت بقهر ليش حرقت علي طيب انا متحمسه و لسى ما شفت الاحداث. بس قلت يلا على الأقل ما كتب ايش أسبابه من ارتكاب الجرائم هذي

انا عندي ما شاء الله ٦ هوايات الي هي: الكتابه، القراءه ، الخبز و المشي. طبعا شاركت معكم الاربعه هذه فقط و فيه ثنيتن ما في مجال صراحه اني اشاركهم معكم يعني احس صعبه ههههه خاصه الاخيره مافي مجال نهائيا اشاركها. بس انا انشغلت عنهم كثير و نفسي ارجع امارسهم. فاحبيت اني ارجع اسوي على الأقل وحده فيهم والي هي المكياج. انا تعلمت احط مكياج بعمر العشرين ومن وقتها حبيته. احكي لكم القصه كيف بداءة

انا من محافظه صغيره و للأسف وقتها ما كان فيها صالونات تزيين نسائيه و اذا كان عندنا مناسبه لازم نجيب كوافير من المدينه عشان تزينا للزواج . وقتها كان عندنا زواج و جبنا احد من المدينه طبعا لازم يجون من بدري لانهم رح يزينون لعوائل ما شاء الله . وصلوا عندنا الساعه ٨ ونص الصباح تقريبا و على ٩ قالوا يلا لازم نبداء ، الي صار ان انا اول وحده ابتداء فيها مكياج و تسريحه. انا توضئت قبل المكياج و الحمدلله صليت الظهر و اموري تمام بس على قريب اذان العصر حسيت اني نعسانه و انا مو نايمه زين ، أصلا انا ما اعرف اقاوم النوم و بنفس الوقت أقول لنفسي الوضوء كيف و المكياج

. كنت بنهار من داخلي خلاص تعبانه نفسيا، بعدها قررت اني انام اسفه ما اقدر اقاوم هههههه . صحيت الحمدلله التسريحه ماصار عليها شيء رحت توضيت و تخيلوا المكياج ما صار عليه شيء و لا التسريحه جاتني الجلطة كيف كذا وقتها ما اعرف هل وضوئي صحيح او هل المكياج يمنع الوضوء ما اعرف صراحه. بس كان طبقته سميكه جدا و التسريحه مع المويا الي حطيتها ما تبلل شعري ما اعرف والله. الي صار من بعد هذا الموقف حلفت اني اتعلم احط مكياج لنفسي و ما احط نفسي بموقف صعب زي كذا. و من يومها رحت تعلمت و حبيت المكياج كاهوايه مره شيء ممتع

اليوم السابع

حبيت اليوم اقضيه بقراءة مواضيعي، تصدقون اني ادخل اتسلى بالمواضيع الي كتبتها. و اجلس اتفاجئ انا أيش كاتبه واتحمس كأني ما اعرف ايش الموضوع ههههه. بحكي لكم شيء انا كل موضوع كتبته له عندي قصه و مشاعر الي عمري ماحكيتها و لا عبرت عنها و ما أتوقع اني رح اعبر عنها بيوم من الأيام. لكن بما اني انا الي كاتبه الكلام انا اعرف بايش مريت و ايش كنت اعاني منه بفترة كتابتي أي موضوع

من سنتين لما قررت اغير المحتوى كنت قاعده امر بحالة خوف لان الي قاعده أسويه يعتبر مجهول بالنسبة لي و مو مخططه له. و كنت امر بمرحلة خوف من الكتابة ووقتها كنت موقفه الموقع عشان تغيير المحتوى فخطر ببالي اكتب هذا المقال انا كاتبه بس ما اكتب .كان اول مقال انزله بعد تغيير المحتوى القديم، كانت هذه هي بدايتي بموضوع الكتابه عن حياتي. ما كان عندي ثقه بنفسي و عانيت من هذي الناحية في البداية و في المقال شرحت عن تجربتي كامله. لكن تدرون ايش الي خلاني اقوى ما شاء الله بسرعه هو اني تذكرت تجربتي بتعلم اللغه الانجليزيه كيف كانت

انا ما كنت واثقه من نفسي وفضلت أخاف اتحدث عشان أخاف اغلط. بعد مرور سنين عرفت ان السبب وراء خوفي هو الكمالية و اقتنعت ان ما في احد كامل و عادي اغلط ماهي نهاية الدنيا. فهذا الي خلاني أكمل بموضوع الكتابه واتغلب على الخوف. بس تعرفون سبب من الأسباب الي خلتني استمر و أكمل هو حماسي الداخلي و احساسي اني لقيت نفسي الحمدلله بشيء احبه

نصيحة اذا عندكم حلم نفسكم تحققونه لا تخلون الخوف يوقفكم او يمنعكم منه انتم سووا الي عليكم و ربي يحلها من عنده. يعني انا كملت بكتابة التدوينات و ما اعرف ايش رح يصير بعد كذا، و لحد الان مكمله بكتابة المواضيع و ما اكذب عليكم ما ادري ايش مصيري بكره و الي بعده بس احس اني ما شاء الله سعيده و مبسوطه بالي قاعده اسويه يومياً

مقالات ذات صله