واخيراً سافرت الى ديرتي.. خيبر

انا ولدت و تربيت في خيبر ، فلما صار عمري ١٨ انتقلت للمدينة للدراسة و استقريت فيها ، ولكن بنهاية العشرين قررت ارجع لخيبر و استقر فيها للابد و فضلت هناك لمدة سنتين تقريباً ، لكن حصلت ظروف و اضطريت ارجع استقر في المدينة المنورة الحمدلله على كل حال. صحيح انا احب المدينه و ممتنه لله اني من سكانها و هذي نعمه الحمدلله و ما شاء الله و لكن انتمائي يظل الى خيبر .يعني حتى لو احد يسألني انتي من وين أقول انا من خيبر بشكل تلقائي احس عايشه جواتي بكل تفاصيلها ، حتى اسمها يذكرني بحياتي الي عشتها فيها و أيام مرت علي سواء زينه او سيئه فعشان كذا مستحيل انكر حبي و انتمائي لها

هذه السفره جات بشكل مفاجئ وبدون تخطيط هي ليوم واحد فقط يعني ما رح اقدر اغطي لكم كل شيء عنها ، ولكن حبيت اني اوثق بعض اللحظات من سفرتي معكم. و أشارك بعض الأماكن الجميلة هناك و قصص من طفولتي و نشأتي فيها

الساعه ٥ الفجر

السفر الفجر

انا ليا سنين ما سافرت في هذا الوقت يعني اخر مره سافرت في الفجر ممكن و انا طفله على ما اذكر. طبعاً هذا الشيء موترني شوي لان الجو بارد و ظلمه . الحمدلله اني لابسه جاكيت و مدفيه نفسي مضبوط عشان ما امرض. اول شيء بسويه اني اجلس ادعي لان الدعوه مستجابه، دعيت لي و دعيت لكم معي . صحيح انا ما اقدر اعرف هل في احد فيكم متابعني بشكل دوري او زائر لمحتوى معين و يطلع لكن دعيت بشكل عام سواء متابع او زائر ان الله يفرجها عليك و يريح قلبك و يفك كربتك و يبعد عنك أي شر و ربي يستجيبها بأذن الله. بعد ما خلصت دعاء عرفت اني مارح اقدر انام فجلست اناظر في السماء و اشوف النجوم ياربي قد ايش جميله ماشاء الله و شكلها واضح و حتى الجبال شكلها رائع و ملفت في الظلام. حاولت اصور بس طبعا مارح تقدرون تشوفونهم في الظلمه

الساعه ٦:٣٠ الصباح

الشروق في خيبر

تصدقون ان امنيتي من ثلاث سنين تقريبا اني اشوف شروق الشمس بهذا الشكل . يعني انا من الناس الي أحبه اكثر من الغروب لانه بدايت يوم جديد احس استبشر انه باذن الله اليوم يكون بدايت حياه و امل جديد. أحب اشوف تدرج الوان الشمس و كيف تطلع بالتدريج ياربي شيء جميل ما شاء الله. على طول من لما دخلنا و شفت الشروق استرجعت كل فجر و شروق شمس مر علي هنا

منظر شروق الشمس من البيت

تذكرت روتيني من ثلاث سنين لما كنت اروح للممشى بعد صلاة الفجر واجلس هناك استنى للشروق كنت احس الشمس قريبه مني مره

الساعه٦:٣٠ الصباح

قصة الكلبه الاليفه

شوفوا كيف جالس هههه ماخذين راحتهم على الاخر . تصدقون ان زمان كان عندي فوبيا من الكلاب الله يكرمكم، يعني ما اقولكم انها خفت الان بس الحمدلله صرت افضل من قبل بكثير رح احكي لكم ليش. قبل ثلاث سنين لما كنت اروح للممشى الصباح كان دائما يكون فيه كلاب اجلكم الله لكن فيه وحده لونها اسود كانت اليفه جدا ما شاء الله. كانت لما تشوف احد ماشي تروح تمشي وراه وما تاذي ابدا، فامره مشت وراي و كنت خايفه و مرعوبه قلت بسم الله أيش تبغى مني. و عرفت انها اليفه من بعد ما لاحظت انها تمشي وراء الكل مو بس انا

وقتها قررت اني اجيب لها اكل معي من البيت و احطه لها من بعيد وهي تجي تاكل. بيوم حطيت لها الاكل و رحت جلست بعيد عشان ما تقرب مني، اكلت شوي و هي فجأه تجي تقرب مني مو مره يعني فيه مسافة مترين كذا و هي تنسدح على العشب و تمسح جسمها فيه و تناظر فيني.  انا جلست أقول ياربي ايش تبغي ماني فاهمه وجلست ادقق فيها عرفت ان في عيونها مبين برائه انو انا ما ابغى اذيك المسيني انا اليفه

حسيت اني نفسي المسها و امسح على راسها بس جواتي فيه خوف من الكلاب بشكل عام و ان لو هاجمتني على غفله. بصراحة ما قدرت المسها وقتها و هي جلست شوي و راحت للمكان الي جايه منه. جلست اناظر فيها و هي رايحه مادري ليه حسيت إني مارح اشوفها بعد كذا للابد. جاء اليوم الثاني و جبت اكل معي كالعادة و قررت هذه المره بإذن الله رح اتشجع و المسها لكن سبحان الله ما جات ولا عاد شفتها من هذاك اليوم. صراحه تخطر ببالي أحيانا أقول ايش صار فيها أتمنى تكون عايشه و بخير يعني احس من بعدها صرت اتقبل اني اقرب من كلب

الساعه ١١:٣٠ الصباح

مجهده و مرهقه

انا خلاص بموت من التعب و الإرهاق يعني انا من الناس الي ما اعرف اسهر و لا اقاوم النوم. فكون اني واصله الى هذه الساعه و انا صاحيه احس خلاص بموت و عقلي بينفجر من الصداع و الإرهاق. ماصدقت دخلت الفندق و نمت على طول من التعب

الساعه ٥ العصر

جوله في خيبر القديمه

صحيت على ٤ ونص كذا صحيح ما اكتفيت بس الحمدلله على الأقل نمت شوي. صحيح تاخرنا على ماطلعنا بس يلا مو مشكله لسى فيه شمس و حابه على السريع اوريكم الطريق الي يودي لخيبر القديمه. هي فيها البيوت ، الدكاكين، الحصون و النخل يعني حياة أهلنا زمان

طريق سحري

هذا الطريق احبه لما كنت صغير وقت الصيف، لان خيبر في الصيف جهنم الحمراء حرها صعب جدا. فلما نمر بهذا الطريق وحنا راجعين من المزرعه كان الطريق بارد جدا و ريحت الشجر و النخل نقيه. الطريق في الجهتين فيه شجر و نخل و الي بيمر من هناك انصحه يفتح الشبابيك عشان يستنشق الهواء النقي و يحس بالهواء البارد وقت الصيف طبعاً

مناظر طبيعيه

شوفوا شكل الطبيعه و الجبال، شوفوا كيف المكان جميل ماشاء الله طبعا لانه شتاء عشان كذا مو اخضر مره بس بالربيع تعالوا شوفوا الجمال او لما تمطر يكون فيه سيول ياربي المكان يكون خطير

منظر خلاب

طبعا هذي المناظر على الطريق فقط كيف لو رحت للاماكن الي يروحون لها الناس وقت نزول المطر (الكشته) او الاماكن التراثية الي جواء و اصور لكم البيوت و العيون و الأماكن الي كانوا ساكنين فيها الناس زمان

فيه بيوت على الجبال و فيه نخل و شجر في المررات و بكل زاويه هناك. طبعا صحيح انا ولدت و تربيت فيها بس في أماكن كثيره ما رحت لها و اجهلها ليومكم هذا. بس انا اوصف لكم الي شفت يعني كيف الي سمعت عنه و ما شفته لسى رح يكون شيء ثاني اكيد

منظر مريح للأعصاب

متخيلين ان كان فيه ناس عايشين هنا و هذا عالمهم و حياتهم سبحان الله. الصور مره ظالمه المكان و ثانيا لأني اصور و السياره ماشيه فااعذروني على الجوده

الساعه ٥:٣٠ العصر

مكان ولادتي

تصدقون هذا البيت الي ولدت فيه من ثلاثين سنه و تحت هذه الشجر بالتحديد. طبعا البيت مهجور خلاص و جدرانه متهدمه بس سبحان الله كيف كان بيوم من الأيام فيه ناس و الان الوضع اختلف. مدري مشاعر ملخبطه جواتي اني ولدت في هذا المكان بالتحديد و من تبدل الأحوال الي صارت لي  حسيت بالحنين  و الحزن ما دري شلون اوصف لكم مشاعري بالضبط لأني احس بلخبطه من داخلي

الساعه ٦ المغرب

استكشاف محل جديد

بعد الجوله الحلوه قررنا نجي هذا المحل هو قريب من الفندق ، توه فاتح جديد الظاهر لان لما كنت هنا ماكان موجود. فيه كل شيء اواني ، مخبوزات ، منتجات غذائيه و اجهزه مره حلو ماشاء الله. و انا ماشيه شفت هذي ذكرتني بايام زمان لما كنا نستخدم الدفايه الجاز و كانت متعددت الاستعمالات تدفي البيت، و نسوي عليها الشاي نحمي عليها الاكل ههههههه مين كان يسوي كذا زينا. فالمهم قلت هذي متطوره عن زمان بس طبعا مافي احد رح يتذكر دفاية زمان غيري انا والي من زماني و اكبر مني

زيتون لذيذ

مين يذكر هذا الزيتون كنت احبه و انا صغيره كان حامض بس لذيذ مع جبن سائل ، تميس و شاهي احمر بنعناع يا سلام نفسي فيه الحين هههههه ، بس للأسف حتى هو جودته تغيرت مو مثل الي زمان

فطائر طازه و سخنه

البيتزا و الفطائر كانوا تحفه لانهم مخبوزين طازجين ماشاء الله انا اعشق ريحت الخبز و المخبز هل انتم مثلي؟ 

كرواسان الشوكلاته

انا احب الكرواسان خاصه لما يكون مغلف بالشوكولاتة و الصوص كذا

بمره رحت بسويه و لما شفت كميت الزبده الي تنحط في العجينه صعقت . يعني تصدقون ان كميت الزبده تكون نفس كميت العجين بالضبط قلت لا مارح أسويها يعني عندي اني اشتريها من براء و اجهل كميت الزبده الي اكلها افضل اني اسويها بيدي و اعرف الكميه المهوله الي بحطها في العجين بنفسي

حبي للمكتبه

طلعت الدور الثاني و فيه قسم للمكتبه

، تدرون اني احب هذا القسم في أي محل زي كذا لازم اروح اشوفه حتى لو ما ابغى اشتري شيء مادري عندي عشق للدفاتر و الاقلام و قبل كنت احب اجمع المراسيم و الدفاتر شيء غريب مني. هل انتم كذا؟ او انا بس لحالي الغريبه هههههه

صحون اعجبتني

شوفوا الصحون هذي مره عجبتني ما شاء الله، بس ما أقدر اشتريها لان مالي نفس اشيل و انقلها معي و انا مسافره صراحه

برطمان جدتي الله يرحمها

. مين يذكر هذا البرطمان يستعملونه بايش ؟ اذكر و انا صغيره لما كنت اروح بيت جدتي الله يرحمها كانت تحط فيه السمن البلدي كنت ما حب ريحته احس مزعجه. بس كانت تحطه في برطمانات أكبر من هذي

الساعه ٧:١٧ المساء

كابتشينو الفندق

انا خلاص راسي مصدع ابغى قهوه ماني قادره عرفت ان الفندق فيه كافيه فقلت بجرب قهوتهم . و بكل امانه طلع طعم ما شاء الله مره كويس اني ماجبت من مكان ثاني. شربت القهوه و حسيت اني بموت من النعاس يادوب خلصت القهوه و قلت خلاص بروح انام لو نص ساعه بس الحمدلله نمت ساعه ونص كذا و حسيت اني صحصحت

الساعه ٩:٣٠ المساء

لحظة تأمل

قررت اسوي لي شاي فراولة و اجلس اسوي كذا شغله، الي هي اخلص شغل في الموقع، ادون ، امارس لغه على السريع و اعدل في المخطط الأسبوعي. كنت ناويه اسوي كل هذا تحت في المقهى بس قلت لا حابه اجلس شوي مع نفسي هنا . جلست افكر ان كيف سبحان الله خيبر تطورت لان زمان ما كان فيه لا مطاعم و لاكافيهات ولا حتى فنادق. كان فيه شقق مفروشه ثنيتن فقط و ما كانت مجهزه بشكل مرتب بكل امانه. والحين فيه اكثر من مقهى و مطعم ما شاء الله و فعاليات تصير ما بين الفترة و الثانية ، فيه حدائق و ممشى في كل حي تغيير مره حلو ما شاء الله ياريته كان موجود و انا مراهقة بالتحديد كان فرق معي كثير بصراحه خاصه لما كنت اطفش و اضيق يكون عندي مكان اغير جو فيه

فعالية الاجازه زمان

تدرون أيام الاجازه الطويله (الشهرين) - لما كنت مراهقه ما كنا نسافر كنا نقضيها في خيبر و هنا ماكان في فعاليات و لا شيء فكنا نقضيها العصر في المزرعة و الليل نروح مكان اسمه القاع (ارض جافه ما فيها لا شجر و عشب قاحله و مساحتها واسعه- طبعا اخذت المصطلح من قوقل)

اغلب اهل خيبر يكونوا هناك بالليل. كنا نجلس هناك نلعب، نسولف و نطبخ. كان المكان ظلمه بس محطة البنزين، المحلات الي قدامه وانوار الشارع هي الي تنور عليه فقط و بعد مو هذاك النور. بس كان مايهمنا ابدا، يعني اهم شيء اننا ننبسط و نغير جو و نرجع البيت على اذان الفجر و حنا مهلوكين و كلنا تراب لازم نستحم من بعده

الساعه ١٠:٥٠ المساء

قطه لطيفه

نزلت اللوبي عشان اقراء هناك لان امس ماقرأت نهائياً، فجأه و اسمع صوت الهواء يا ويلي برد خيبر فضيع انا مثقله بلبسي ما تدرون قد ايش بس على كل هذا احس اني مجمده و بموت من البروده. و انا جالسه شفت قطتين وحده برتقاليه و الثانيه رصاصي ماقدرت اقاوم قلت بطلع اصورهم حتى لو برد. البرتقاليه هربت بس هذي لحقت اصورها لكن من بعيد ما اقدر اقرب و لا تهرب ياربي ماشاء كيف كيوت جلست تناظر فيني احسها تقول هذي العبيطه ايش تبغى مني تصورني في هالبرد ههههههه. يا دوب صورتها على السريع و دخلت ما تحملت البرد القارس

الساعه ١٢:٣٠ الصباح

قصة الساعه الورديه

رحت للسوبر ماركت فاطريق عشان مسافرين بعد دقائق ، السوبر هذا كان مكانه مجمع ملابس و اكسسوارات. اذكر لما فتح كان عمري ممكن ١٢ كذا و كنت مبسوطه اني بروح مجمع لما دخلته كنت مذهوله انه قد ايش كبير و فيه كل شيء نفس مولات المدينه. المهم وقتها شفت ساعه بخمسه وعشرين ريال لونها وردي مره اعجبتني . طبعاً زمان هذا السعر مره كثير فهو يعتبر مبلغ كبير لبنت بعمري ههههه كنت مجمعته ليا اشهر على شكل ريالات عشان يبين في المحفظه اني معي فلوس كثيره هههههه وهو خمسه و عشرين بس يا حبيبتي يا انا. المهم انتهى بي المطاف اني اشتريتها بهذا المبلغ طبعا كنت احسبها اصليه لانها بخمسه وعشرين هههههه مره كثير على ميزانيتي، الي صار اني فرحت فيها و صرت البسها طول الوقت و اذا فسختها قفلتها من الزر الي بالجنب عشان ما اخلص الحجر او البطاريه حقتها ، بس بعدها بشهر وقفت و ما عادت تشتغل و صرت البسها و هي خربانه ما يهمني لازم احلل فلوسي انا دافعه خمسه و عشرين ريال مو قليل هههههه

لعبة الطفوله

انا جواتي في شيء يقولي لي روحي قسم الألعاب ، لما رحت شفت اللعبه هذي فرحت مره (سامحوني على زاوية التصوير بس كنت مستعجله

اذكر لما كنت صغيره كان عندي ارنب او كلب اجلكم الله نفس هيئته بالتقريب بس هذاك كان اصغر و لونه رمادي و منقط بأسود و اذانه طويله .ما دري مين جابه لي ما افتكر بس كنت احبه مره و كنت اروح فيه بكل مكان ما اذكر ايش سميته ، اذكر مره شفت وحده بمسلسل قديم معها مثله ياه زمان والله

نهاية الرحله

صحيح هل في احد خمن انها خيبر الي مسافره لها او لا هل عرفتوا من التلميح الي كتبته لكم، وقتها في هذه التدوينه انا كنت مصوره كتبي و فيه كتاب تاريخ كان عن خيبر أتمنى ان كان عندكم دقت ملاحظه و شفتوه هههه

هذي نهاية رحلتي لخيبر، صحيح كانت ليوم واحد و اقل كمان لكن انبسطت الحمدلله ،استرجعت فيها ذكريات كثيره و حكيت لكم عن أشياء ما توقعت اني اكتبها هنا بيوم من الأيام. أتمنى انكم انبسطتوا و تعرفتوا على ديرتي الجميله ما شاء الله