أسبوع من حياتي- روتيني وقت الإجازة
اقضوا معاي أسبوع من حياتي - روتيني لما اخذت اجازه من الكتابه و الموقع. فضفضت معكم، سويت كيكه يوم السبت، فرزت الكتب الي عندي، رحت لعائلة اسيا، صليت في المسجد النبوي، خلصت روايه، طلعت مع نفسي، استرجعت الذكريات، فعالية يوم الجمعه
فضفضه بسيطه
انا لي أسبوع ما شاركت يومياتي معكم لعدت أسباب. أولا ًلاني كنت مجهده عقلياً بسبب التدوينه الي شاركت فيها روتيني مع الكتابه من أسبوعين حرفيا اخذ جهد عقلي و نفسي كبير مني. ثانياً احس بإرهاق جسدي كبير فحبيت ارتاح شوي و للامانه لحد الان و انا اكتب الكلام عندي ارهاق فضيع ادعولي ربي يشافيني . ثالثاً اكتشفت بالصدفه اني كتبت حوالي ٤١ تدوينه في الموقع لحد الان ماشاء الله انصدمت من الرقم لاني كنت حاطه ببالي هدف هو ١٠ تدوينات و لقيت اني ماشاء الله تخطيته بمراحل حسيت ماشاء الله بإنجاز فعشان كذا رحت كتبت عنه و حطيته في علبة الإنجاز . عشان هذه المناسبه حبيت احتفل مع نفسي و اخذ اجازه لمدة أسبوع انبسط بإنجازي بس ماقدرت سبحان الله بسبب التعب الجسدي الحمدلله. يعني كل الأسباب سبحان الله جات مره وحده بدون تخطيط، بس وحشتوني مره احس مو كأنه أسبوع احسه سنه ، عشان كذا حابه أشارك معكم بعض الأشياء الي سويتها في فترت الأسبوع هذاك لان لو كتبت كل شيء مارح اخلص كتابه ما شاء الله هههه، اتمنى لكم وقت ممتع في القراءه
السبت
الساعه ٨ المساء
سويت كيكة التوت
في امر مسبب لي التوتر اليوم و احس ابغى اشتت انتباهي عنه عشان كذا رحت سويت كيكه الان مع ان مو في العاده اسوي كيك اليوم. و هذا الوقت بالغالب أكون جالسه اسوي شيء فيه يخص الكتابه و الموقع، لكن ابغى شيء يشيل التفكير عني ويخليني ما اركز مع الأفكار السلبيه
الساعه ١٢ الصباح
لسى متوتره
الحين خلصت شغل من الكتابه و الموقع مو بالعاده اخذ هذا الوقت ممكن لاني بدايت متأخر اليوم. و لسى عندي ممارسه للغه بعده بس الظاهر رح اكنسل لان عقلي مو مستحمل و ماني قادره اركز . انا حاطه هذا الأسبوع عندي هدف اني ما اوتر نفسي نهائيا و ابعد عن أي شيء ممكن يزعجني ، يوترني او يضايقني. الحمدلله اني مقرره اخذ بريك هذا الأسبوع من كتابة محتوى يوم الخميس لان كنت رح اتوتر اكثر و اتعب نفسيا بسبب الضغط النفسي
يوم الاحد
الساعه ٨ المساء
جرد الكتب
توني خلصت مراجعه لمحتوى بكره بإذن الله الحمدالله اني كاتبه كم موضوع من قبل ولا حرفياً ما عندي طاقه اكتب محتويات. احس فيني ارهاق مو طبيعي يارب رحمتك، بس على كل هذا قررت اني أقوم اتشجع و اسوي جرد للكتب الي عندي و ما قرأتها، ( حاليا وانا اكتب الكلام يعني بعدها بكم يوم- بديت في واحد فيهم و وقفته رح اكتب لكم السبب بعد شوي). كتبت أسماء الكتب في الصوره لان ممكن ماهي واضحة من التصوير
الاثنين
الساعه ١١ المساء
احس اني اتوحم
حفظت التدوينه الي نزلت، و سويت روتين شعري فا احس اني بموت من البرد و الإرهاق بس نفسي في ام علي. هذه الأيام أحس اني اتوحم على ام علي يا ربي بس طول الوقت نفسي فيها و ابغاها سايحه و ساخنه و سكرها يكون مضبوط. وقتها ما كنت اعرف اسويها و رحت اليوتيوب ادور وصفتها اول فيديو فتحته عنها، اول شيء قالته الشيف جيبي قطعت قلاش على طول قفلت الفيديو ههههه فاضيه انا اجيب قلاش و ادخله الفرن بعدها اطبق الوصفه مره خطوات كثير علي هههه، انا ابغى شيء سريع . الحمدلله لقيت واحد مسويها بطريقه سهله و سويتها فا خلاص صار هذا حلا الشتاء هذه السنة بالنسبة لي . السنه الي فاتت كنت اسوي بطاطا حلوه بالباشاميل مره طعمه كنت اكلها حاره نفس ام علي
الثلاثاء
الساعه ٩ المساء
موعدي الخاص
ما كنت ناويه اطلع اليوم بس كنت تعبانة نفسياً و متضايقة فقلت اطلع اغير جو. خاصه اني صايره ما اطلع من البيت الا يوم واحد بسبب شغل الموقع و روتيني الخاص مره ضغط. بس بما أني اجازه هذا الأسبوع أحس عندي وقت اسوي أشياء اضافيه، فحبيت اليوم اخلص الروايه . انا كتبت تدوينه كامله عنها تقدرون تقرأون ملخص الفصول الأخيرة و رأيي فيها من هنا. الرواية لأختي وهي نفسها ما قراتها ولما قريتها و حكيت لها الملخص ما عجبتها و قالت لي خذيها لك ههههه جاتني رواية هديه، صراحه هي مسليه و اشوف نفسي ارجع اقراها من جديد بعد كم سنه بإذن الله
الأربعاء
الساعه ١٠ المساء
قطه في المسجد النبوي
الحمدلله على النعمه اني اقدر اروح للمسجد متى ما ابغى ربي ادمها علي نعمه. احب البسس هناك مره لطيفه ما شاء الله وما تخاف مننا يعني هذه جت و جلست على الطاوله و نامت ما شاء الله ولا هي خايفه مننا و تخلينا نلمسها عادي، و في وحده جالسه جوات عبايتي من تحت هههه يعني انا احب البسس الحمدلله و ما أخاف منهم عشان كذا مخليتها على كيفها قلت حرام اكيد بردانه و مدفيه تحت العبايه فضلت جالسه طول المده الي كنت قاعده فيها يعني ساعتين ونص كذا ما شاء الله
الخميس
الساعه ٨ المساء
قهوه جديده
شفت القهوه قلت اخذها تغيير عن الي دائما اشتريها بس شفت مكتوب عليها انتنسو انا ما اعرف إيطالي بس الكلمه قريبه من كلمه انجليزيه اسمها انتنس يعني مكثف او قوي ، الشيء الحلو بالغه الإنجليزية انها مأخذه من جميع اللغات حتى العربية بس اكثر شيء مأخذه من اللغات الرومانسية او اللاتينية وهي الفرنسي ، الإيطالي ، البرتغالي ، الاسباني و روماني. عشان كذا الي يبغى يتعلم أي لغه من هذه اللغات يتعلم انجليزي اول حاجه لان رح تسهل عليه تعلمها. المهم فقلت اكيد الكلمة هذه نفس الي اعرفها بالإنجليزي و طلع كلامي صح ذقت القهوة و فعلا قويه مو مثل الي كنت اخذها من قبل اعجبتني بس الحمدلله ما وجعت لي قلبي هذا اهم شيء عندي
الساعه ١٠ المساء
عائلة اسيا
هذا المتجر فتح له مده في حينا ورحت له من شهر او شهرين و نسيت اكتب عنه هنا (طبعا هذا مو اعلان انا مو مشهوره عشان اعلن هههههه). صراحه افضل من المتجر الي رحت له من قبل، هذا فيه خيارات كثيره و المنتجات متنوعه ماشاء الله و الأهم انه قريب من عندي. حابه أشارك معكم بعض الأشياء الي جربتها هناك
كورن دوج
ذقت الي بالجبنه من شهر حسيت ان فعلا تحتاج صوص كاتشب و ماسترد و السكر الناعم من الخارج . هذه ماهي مغلفه فيه حسيت انه يحتاج لها سكر بس مالي نفس اروح احط و استكفيت بالكاتشب اعطيها ١٠ من ١٠
الثاني ذقته الحين كنت متردده اجيبه لان شكل البطاطس مخوفني صراحه ، بس لما فتحته الحمدلله ماهو مخيف و مقشعر. الي عجبني التغليف افضل من الي بالجبن كل وحده فيهم لها كيس خاص فيها . هذا حلو لو حابه اجمد الباقين و ما يخذون مساحه في الفريزر. بس الي قهرني كيكة السمك الي جواته مع ان نكتها ماهي مؤذيه بس ما عجبتني، نكهه الجبنه ما كان فيها كعكة السمك. بس ما استمتعت بطعمها مثل النكهه الساده فعشان كذا اعطيها ٥ من ١٠ ما اعتقد رح اجيبها مره ثانيه
كوكيز الفراولة
اشتريت هذا الكوكيز بنكهة الفراوله ، مره هش و يذوب في الفم و الحلو انه خفيف يعني ماتحسين ان فيه زيوت تغث و سكره مضبوط و طعم الفراوله مره لذيذ اعطيه ١٠ من ١٠
شيبس بالملح و الخل
الشيبس هذا ما انتبهت ان فيه خل انا اكره طعم الخل و الملح في الشيبس. لاحظت ان الاسيويين يحبون نكهة المنتجات البحريه في اكلهم خاصه السناكات سبحان الله. بس هذا ما عجبني طعم الخل و الملح مره زياده اعطيه ٣ من ١٠
شيبس حلو و مالح
. هذا الشبس فيه طعم حلاوه على ملوحه بس طعم الحلاوه طاغيه اكثر و فيه نكهة ثوم كمان بس بسيطه عجبني اعطيه ١٠من ١٠
قهوه بارده بالبندق
هذه قهوه بارده بطعم البندق صراحه مو انا الي اشتريتها بس ذقتها حسيت ان نكتها كانها قهوه من مقهى مختص مو من سوبر ماركت ماشاء الله . بس طعم البندق مره قوي صحيح هي قهوة بندق و المفروض انه يكون طاغي بس حسيته ضايقني لاني ما احب طعم البندق في القهوه عشان كذا اعطيها ٩ من ١٠
ايس كريم وافل
هذا ايس كريم وافل محشي ايس كريم فانيلا و شوكلاته بار ، طري من بره و الشوكلاته تحسون انها شوكلاته غاليه و فرش يعني نفس طعم شوكلاته جالكسي او هرشي مره طعم اعطيه ١٠ من ١٠
الساعه ٢:٤٠ الصباح
لعبت اوفر كوكد-overcooked
كنت جالسه طفشانه فجأه قررنا نلعب اوفر كوكد ، انا احب العب بشخصيات محدده ما احب المخلوقات العجيبه الي مسوينها . مره اشتقت للعبه و استرجعت الذكريات و جيبات العيد الي اسويها ههههه. على سبيل المثال في مرحله من المراحل كان مطلوب مننا نسوي سوشي مع صعوبه ان الأرض فيها نفس السلم المتحرك في وسط المطبخ فقط، المهم انا رحت اخذت السمك عشان اقطعه في القطاعه و رحت مشيت في الأرض المتحركه و بالغلط حطيت السمك على الطاوله و شلت طفاية الحريق مكانه و حطيت الطفايه على القطاعه هههه. و كنت بحرك الطفايه بس الرز خلص طبخ و لازم اشيله من على النار او يحترق و رحت للرز و نسيت الطفايه ، و الي معاي قالوا مين حاطها هنا هههههه كارثه يعني اللعب مره مسليه و هذه الأخطاء البسيطه الي نسويها هي الي تعطي جو و ناسه في اللعب يعني مو اللعبه نفسها من وجهة نظري
الجمعه
الساعه ٩ المساء
فعالية يوم الجمعه
انا ما احب يوم الجمعه اجلس في البيت مادري ليه اتضايق عشان كذا اروح مقهى اغير جو. اليوم حبيت انجز شوي و أسوي كم شغله في الموقع و بعدها قرأت هذا الكتاب. هذا الكتاب ربحته من مسابقه و قرأت كم صفحه منه من سنين و وقفت ما دري ليه، بس انا الحين بتحدي اقراء الكتب الي عندي فقلت خليني اقراه. انا رح اكتب عنه ان شاء الله بس رح اعطيكم تسريبه عن رايي فيه صراحه وقفت قراءته مع اني وصلت للفصل السابع تقريبا بس قلت ما اضغط على نفسي اكثر من كذا الكتاب ما هو وقته اني اقراه الحين بس ممكن ان شاء الله مستقبلا لما يكون عندي مشروع بإذن الله لان فيه نصايح ممكن اخذها بعين الاعتبار بس الان حسيت بالملل و الزهق. يعني احس نفسي بس اقراء روايات عشان طلعني من جو الحياه الصعب و تغير جوي