تلخيص رواية- الحب الذي قسم العالم

The love that split the world

الكاتبة: ايميلي هنري

فئة الكتاب: رواية رومانسية خياليه

سعرها:٢٥ ريال

تقييمي للرواية ٧ من ١٠

ملخص الروايه من الفصل الأول الى الأربع عشر

تحكي الروايه عن بنت من الهنود الحمر اسمها نتالي. هي طفله متبناه من قبل عائله من كان عمرها ١١ يوم. نتالي وهي صغيره كانت تطلع لها اشباح في غرفتها في الليل و كان شكلهم غريب و مرعب و كانت تأذيها . فنتالي كانت تصارخ و تنادي لامها و ابوها عشان ينقذونها منهم. بس لما يجون الاب والام ما يشوفون المخلوقات الي تتكلم عنها نتالي. فكان ينتهي الامر انها تنام في غرفة أمها و ابوها. فا بليله و بنفس التوقيت نتالي كانت بغرفتها فجأة ظهرت لها مراءه كبيره في السن من الهنود الحمر، نتالي و لأول مره ما خافت و لا صرخت الا بالعاكس ارتاحت و جلست تناظر فيها. الي حدث ان هذه المراءه صارت تزورها يوميا و تحكي لها قصص اسطوريه تاريخيه عن بداية الحياه و عن الهنود الحمر. و في هذه الفتره اهل نتالي اعرضوها على معالجه نفسيه ، و نتالي كانت متجاوبه و متعاونه مع المعالجه

فا بيوم المعالجه سوت لنتالي جلسه نفس جلسات التنويم المغناطيسي من بعد هذي الجلسه نتالي ما عادت تشوف المخلوقات الغريبه او حتى المراءه العجوز او الجده مثل ما اسمتها نتالي. و المعالجة قالت السبب انها تشوف هذي المخلوقات و الجده هو عقل نتالي الباطن قاعد يتخيل و يألف قصص على انها حقيقه، لما قالت نتالي لصديقتها ميجن هذا الكلام قالت لها ميجن مع احترامي الشديد لك لكن عقلك الباطن مستحيل يكون مثقف لهذه الدرجه انه يختلق القصص الي تحكيها الجده او يتخيل شخصيه حكيمه مثل الجده هههههه يعني جلست طقطق عليها مثل ما نقول حنا بالعامية. المهم الجده اختفت لمدة ثلاث سنين و نتالي دخلت بتعب نفسي طوال هذه المده وانعزلت وما صارت حتى تقوم بالنشاطات الي تحبها لأنها فقدتها

بعدها ظهرت الجده بشكل مفاجئ بأحد الليالي و جلست نتالي تعاتبها، فجلسوا يتكلمون طوال الليل الى ان جاء الفجر هنا الجده قررت تروح بس قالت لنتالي ابحثي عن اليس شان و ترى عندك كم شهر عشان تنقضيه و اختفت. هنا نتالي جاتها حيره من هذي اليس و من هو الشخص الي لازم أنقضه و جلست بحيره كبيره. بعدها نتالي صارت تحدث معها حاله غريبه انها تشوف أحلام يقضه بشكل مفاجئ، مثال بيوم كانت في ملعب المدرسه و كان زحمه و فيه مباراة قائمه نتالي حست بزغلله في عيونها و الم بمعدتها و جسمها يرجف و الرؤيا ماهي واضحة. فجاه اختفوا الناس الي في الملعب و شافت نفسها لحالها اذا فجاه تشوف ولد بعمرها طويل عريض المنكبين شعره بني لابس بلوزه بيضاء و جنز ازرق و معاه شنطه ما سكها في يده وجالس يناظر بالسماء. و بثانيه وهي ترجع للواقع و رجعوا الناس في الملعب ولا كانوا شيء صار

و صارت تتكرر هذه الرؤى بأشكال مختلفه، بعدها نتالي توفقت و حصلت اليس و الي اكتشفت انها دكتوره في الجامعه تخصصها علم ما وراء الطبيعه، تواصلت معها و حكت لها كل شي عن الجده ، المخلوقات و الرؤى. فصار ما بينهم مواعيد اسبوعيه عشان يتباحثون عن هذا الموضوع، بس اليس فسرت الي قاعد يصير معها ممكن يكون صدمه في الطفوله هي الي مسببه كل هذا و نتالي ناسيتها او هي الي حاذفتها من ذاكرتها عن قصد. كان هذا مجرد احتمال من الاحتمالات الي فكرت فيها اليس بس لسى قاعده تبحث عن الأسباب مع نتالي، بس طلبت من نتالي انها تحط نفسها في مواقف تسبب التوتر و الغضب على قد ما تقدر لان الصدمات تظهر لما يكون في محفز لها او لما نعيش نفس الموقف مره ثانيه من هنا احنا ننهار و نتذكر كل شيء مرينا فيه

ملخص الروايه من الفصل الخامس عشر الى الثالث و الثلاثين

طيب مو اخر شيء اليس قالت لنتالي وتري نفسك على قد ما تقدري عشان الصدمات تظهر و تتذكرين كل شيء، الي صار ان نتالي عندها حبيب وانفصلت عنه . حبيبها السابق اسمه مات وقتها كان يحاول انه يرجع العلاقة مثل ما كانت وهي رافضه لان عندها مشاكل بهويتها الشخصية. كانت تحس انها ما تنتمي لبيئتها و أهلها لأنها متبناه و لان اصلها يرجع من الهنود الحمر فا كان عندها فضول تعرف عن اصلها و بيئتها. بس بنفس الوقت كانت تحاول انها تتعايش مع بيئتها الجديدة انها تسوي الي أهلها يبغونه مثلا تعلمت الرقص لان أمها تحب الرقص، تعرفت على مات لأنه مشهور بالمدرسة. كانت تكتم مشاعرها و الي تحس فيه و عدم انتماءها عشان ما تزعل أحد خاصه أمها لأنها جدا لطيفه و حنونه معها. عشان كذا هي حابه تروح جامعه معينه لأنها قريبه من جماعات او قبائل الهنود الحمر و لأنها حابه تبتدئ حياه جديده مع ناس ما يعرفونها و تكون بشخصيتها الحقيقية. مات عزمها على يوم ميلاده هي في البداية كانت رافضه بس بعد كلام اليس راحت عشان هي عارفه مات رح يوترها من كلامه و شوفته. و فعلا صارت مشكله ما بينهم ، طلعت من بيته و راحت تمشي بالشارع

 طيب خلونا نرجع للوراء للرؤيا الي شافته من قبل في ملعب المدرسة، تذكرون الولد الي كان في الملعب الي يومها ظهر فجأة و اختفى، الي صار بيومها بعد ما خلصت المباراة و نتالي واصحابها بيروحون للمطعم اكتشفت ان جوالها مخلص شحن فقالت لأصحابها بروح بسرعه لدرجي داخل المدرسة اجيب الشاحن و اجي. اخذت الشاحن من الدرج و هي ماشيه في الممر سمعت عزف بيانو من قاعة الموسيقى فتحت الباب و شافت ان الولد نفسه الي في الملعب قاعد يعزف على البيانو، تكملت معاه و طلع اسمه بيو وهو طالب معهم في المدرسة. و من هذاك الوقت صاروا يلتقون مع بعض بالصدفة و يتكلمون

نرجع الان الى حفلة يوم ميلاد مات نتالي قاعده تمشي في الشارع بعد ما طلعت من الحفله و كانت بحالة صدمه، غضب و توتر. فضلت واقفه في السكه تنتظر أحد يوصلها للبيت، جات سياره وقفت لها و طلع السائق هو بيو. عرض عليها انه يوصلها وهي ركبت معاه لكن بعد تردد كبير لأنها زعلانه منه. و هما ماشين شافت كنيسه على الطريق كان شكلها مختلف لما كانت رايحه للحفلة فيه أشياء انضافت للبناية ما كانت موجودة من قبل. سألت بيو هل شفت تغيير فيها و انت رايح للحفله هو ابتسم و قال لا، كملوا طريقهم وصلها البيت. بعدها بكم ساعة رجع لها بيو و قال لها انو انا مثلك اشوف اشباح وأحلام يقضه وان هذا الامر ابتدأ معاي من سن صغير، و عرف انها مثله لما انتبهت لتغيير الكنيسة. قال لنتالي ان فيه عالمين عالمها و عالمه و انه هو يتنقل ما بينهم، و ان الأشخاص الي في حياتنا لهم شخصيتين. اما انا و انتي الي شخص واحد في عالمنا فقط. نتالي انصدمت من الخبر واخذته معاها الى اليس و خبرها بكل شيء يعرفه، لكن بيو عمره ما التقى في الجدة ولا شافها ولا يعرفها. بعدها اليس طلبت من بيو يساعد نتالي انهم يلاقون الجدة عشان يعرفون من هو الشخص الي لازم ينقضونه في اقل من شهرين

صارت نتالي مواظبة على زيارات اليس و جلسات التنويم المغناطيسي عشان يكتشفون اسرار من حياتها. و كانت تشوف بيو هذه الفترة كمان، فا بيوم طلب منها تروح معاه في عالمه تحضر حفله لاحد أصدقائه و هناك شافت مات لكن -الشخصية الثانية الي ما يعرفها-، فجأة وقت الحفلة تغير العالم و صاروا بعالم نتالي و مات -الشخصية الي بعالم نتالي- شافها مع بيو عصب و انقهر و صارت مشكله كبيره ما بينهم الثلاثة. ركب مات سيارته و سوا حادث و صار عنده تلف بالدماغ و دخل بغيبوبة. بعدها بفتره مات توفى في عالمها، و لكن صحي من الغيبوبة و كان بصحه و عافيه في عالم بيو. هذاك الوقت بيو صار يختفي لأيام ولما يرجع يقول كانت تواجهني صعوبة عشان اجي عالمك، و تعقد الموضوع الى ان وصل الامر و بيو جالس مع نتالي صار يختفي

اليس وضحت لنتالي ان عالم بيو وقته بداء يخلص لازم نلاقي الجدة او مارح تشوفيه للأبد. بعدها بيوم نتالي كانت عند اليس تسوي جلسة تنويم و استيقظت منها حصلت اليس ملامحها متغيرة سألتها ايش صار قالت لها اسمعي التسجيل الصوتي و رح تعرفين، لما سمعته اكتشفت انها تعرضت لحادث سيارة وهي صغيره مع أمها و ابوها. وقتها أمها هي الي كانت سائقه، و هذا السبب الي خلى نتالي تشوف منام بشبه يومي انها تكون مع أمها و يصير فيهم حادث و السيارة تمتلئ بالدم رغم لا هي و لا أمها فيهم جروح فتصارخ نتالي و تستيقظ من النوم. نتالي اتصلت بأمها و لامتها ليش خبيتي الامر عني، أمها قالت لها انا خبيته لأني ما ابغى اتعبك نفسيا. المهم نتالي انهارت من كل الي قاعد يصير بحياتها و حتى ما عادت تشوف بيو لها أيام و تحاول تنتقل لعالمه مو قادره. ركبت سيارتها و صارت تمشي ما بين بيتهم الى بيت اصحابها حتى وصلت عند المقبره و شافت قبر مات و قبر قريب منه مكتوب عليه بيو

استغربت و راحت لبيت بيو و جلست بغرفته على امل انه يظهر و فجأة ظهر بعدها قال لها ان اخوه باع سيارته و حياته صارت صعبه جدا، اخذته نتالي و راحت لبيت صديقتها لان أهلها كانوا مسافرين و ما رضوا انها تجلس في البيت لحالها فطلبوا من اهل صديقتها انها تجلس عندهم فتره. لما راحوا هناك شافت نتالي جرح في كتف بيو قالت له من ايش هذا الجرح؟ قال هذا وانا عمري خمس سنين كنت مع ابوي و صار علينا حادث و قال لها وين موقع الحادث بالضبط و من هنا عرفت انه الحادث الي صار لها و هي صغيره كان مع بيو و ابوه. فقالت له خلاص انا عرفت وين احصل الجدة خليك هنا بروح اشوفها و ارجعلك

راحت نتالي لبيتهم و دخلت غرفتها و غمضت عينها عشان ترجع الوقت لوراء الى ان وصلت لليوم الي كلمتها فيه الجدة قبل ثلاث شهور. شافت الوقت الي هي و الجدة جالسين يتكلمون فيه ، فجأة نفسها الي من ثلاث شهور اختفت و بقت الجدة. وقفت الجدة و سألتها نتالي مين انتي بالضبط؟ قالت لها الجدة انا انتي بس في المستقبل، انصدمت نتالي قالت طيب أيش موضوع العالمين. قالت ما في شي اسمه عالمين انتي تتحكمين في الوقت في الماضي والمستقبل، و بيو لما صار الحادث مع اهلك توفى عشان كذا هو ما هو موجود بعالمك و لا انتي موجوده بعالمه. فا انتي تروحين لعالمه لان معك القدرة للرجوع للماضي وهو الشخص الي لازم تنقضيه لأني فقدت القدرة بالتحكم في الوقت

عشت حياتي من غيره و كانت حياتي فاضيه من غير معنى رحت للجامعة الي خططتي عليها، تزوجت احد زملائي في الجامعة رجعت هنا اصبحت معلمه في في الجامعة .و صرت اساعد اليس في ابحاثها عشان نساعد الناس الي مثلي . اليس ماتت وانا لسى مكمله، اهلي باعوا البيت و انتقلوا لولاية ثانيه. و كل هذا الوقت و انا أفكر ببيو و عمري ما نسيته و عندي امل ارجع اتحكم بالوقت مثل قبل، بعدها خطر ببالي إني اشتري بيت اهلي و ارممه و ارجع الغرفه حقتي مثل ما كانت قلت ممكن ارجع التقي بنفسي زمان او اتحكم بالوقت مثل قبل. بيوم و انا جالسه على الكرسي و انتي تظهرين بس بعمر صغير وقتها خفت اخبرك عن مستقبلك فتحزنين لأنك طفله. فقررت احكي لك قصص أسطورية فيها تلميحات عن مستقبلك عشان تلاقين الحل منها لما تكبرين

كنت أتمنى اخبرك عن اليس من بدري عشان تتمكنين من الامر في وقت ابكر بس ما قدرت لان انتي وقتها تتحكمين بالوقت الي ما بينا و طوال هذه المدة انتي تبحثين عني و انا موجوده هنا ما تحركت و اسمعك بس انتي الوحيدة الي تقدرين تتحكمين بالوقت الي بيننا. فقالت لها مستقبل بيو يحدده حاضرك لازم تختارين صح. قالت نتالي يعني تقولين لي اقتل نفسي؟ قالت الجده لا بس انا عشت من غيره و شفت الحياة كيف و في النهاية كل الي حولي ماتوا حتى انا قاعده احتضر. قالت نتالي يعني ما في حل وسط يا يموت بيو يا انا اموت ؟، قالت لها ما في حل اختاري صح لان باقي وقت بسيط و عالم بيو يختفي للابد. ومن هنا قررت نتالي ترجع لوقت الحادث وهم صغار و وقفت في الطريق و ظهر كوكب مضيء اخذها و اختفت لما أهلها وقفوا السياره في الشارع و اخر شي سمعته أمها تقول انا متأكده اني شفت بنت واقفه في الطريق

رأيي في الرواية

انا من بداية الرواية لنهايتها متحمسة لها بس احسها تلخبط، يعني كانت تتكلم عن الاشباح و شوي دخلت بموضوع علم النفس و شوي راحت لموضوع السفر عبر الزمن. يعني الي يقراءها رح يحس بحوسه و لخبطه و انا حاولت ارتبها و ألخصها على قد ما اقدر بكل صراحه لأنها تتوه، و النهاية مبهمة يعني ما وضحت نتالي ماتت و لا بيو نجى و لا ايش صار بعدها.  ثانيا بموضوع حادث مات نتالي بالغت بردت الفعل و لوم نفسها بالحادث مع انها مالها ذنب فيه. و حسيت الكاتبة مره طولت بالأحداث و فيه مط فضيع ماله داعي، يعني مثلا زيارات نتالي لي اليس مالها لازمه و الحوارات ما بينهم متكررة وما فأدت القصة. الي عجبني قصص الجدة و علاقة نتالي باهلها مره حلوه. طيب رحت بعد ما خلصتها لقوقل اشوف اراء الناس الي قرأوها و كتبوا رأيهم عنها و طلع الكل مثلي حس بلخبطه، و كثير اعطوها تقييم نازل بس الي عجبهم الرومانسية الي ما بين بيو و نتالي و قصص الجدة. انا ما توقعت النهاية كذا لكن الي حبيته محادثتها الأخيرة مع الجدة و كشف الحقيقة بس المشهد الأخير ضيع كل شيء. استمتعت في قرأتها رغم  اللخبطة الي صارت