اقضوا اليوم معي {الأربعاء ٦-١٢-٤٥}
زمان لما كنت صغيره كنت احب يوم الخميس لانه اجازه عندنا، لكن لما صرت بالثلاثين صرت احب يوم الأربعاء لانه اجازه لي انا اسوي فيه الأشياء الي احبها واقضيه مع نفسي ولنفسي بهدؤ وسكينه وانسى أي مشكله و مهام المفروض اسويها وحقيقي فرق كثير معي هذا الشيء
٧ الصباح
احب ابداء يومي بالمقهى المفضل عندي، الان ليا قرابة الشهر اروح الصباح هدؤ وراحه بس اليوم فيه شباب مسوين ازعاج الله يهديهم خربوا علي جو الاستكنان لكن ماعلي مافي شي يوقفني.احب اقضيه كلام مع نفسي واتكلم مع نفسي عن تفاصيل حياتي كإني قاعده اتكلم مع صديقه ،اليوم حبيت أتكلم مع نفسي عن خططي ليوم عرفه والسنه الجديده باذن الله اذا ربي اطال بعمري ليش؟ لاني من سنتين قررت اكتب ايش ابغى ادعي فيه بيوم عرفه من باب الفضول اشوف ايش بيصير . وصرت ارجع له قبل يوم عرفه الي بعده ولقيت ان نص الي كاتبته تحقق الحمدلله، مثلا السنه الي فاتت كتبت ٢٠ امنيه اتمنى تتحقق ولما رجعت لها لقيت ٨ منها الحمدالله تحقق تحمست للامر اكثر فحابه اكتب هالمره بطريقه ثانيه
طريقة The 7 dimensions of wellnes
يعني عند كل واحد فيهم اكتب هدفي بالتفصيل
أحيانا اكتب بطريقه اني عايشه الحلم هذا وضبطت معاي كثير ماشاء الله واحيانا اكتب بالتفصيل انا ايش ابغى. اليوم حابه اكتب بالتفصيل. والبعض يرجح انو نكتب بيدنا عشان العقل يستجيب اكثر من استخدام الاجهزه لكن انا حاليا بكتب بجهاز ماتفرق معاي
١١ الصباح
بعد ما ارجع من المقهى احب اجلس اتفرج على مسلسل او فلم اليوم كان الاختيار على اينمي صراحه ليا يومين اتابعه بس جميل ، لكن صدمه الشخصيه الرئيسيه طلعت بنت ومتخفيه على انها ولد. انا تقريبا نوعا ما اعتبر جديده على موضوع الانمي ليا ثلاث سنين فيها ، ابتديت الموضوع عن طريق هجوم العمالقه مره كانت جميله وحبيت الانمي من يومها
٤ العصر
العاده بعد ما اشرب القهوه المختصه الصباح ما ارجع اشرب قهوه نهائيا بس اليوم ما ادري ليش حابه اجيب اجلي، هاليومين نفسي بس اشرب قهوه تركي مادري ليه والحمدلله صرت اضبط الوش على الأقل
. قصه طريفه
لما كنت صغيره كنت اتابع مسلسلات سوريه كثير وكانت اجمل فقره عندي لما الممثل او الممثله تسوي قهوه اول ماتصحى من النوم مع كاست المويا وتجلس على البلكونه شعور رائع ، فا بذاك الوقت المكان الي كنت ساكنه فيه ما كان موجود فيه هذي القهوه. او ممكن موجود وانا ما اعرف . المهم كنت ايش اسوي اروح اجيب قهوه خضراء ماهي محمصه او محمصه تحميص فاتح واروح احمصها زياده على النار الين ماتصير سوداء اطحنها واسويها زيهم اجلس اشربها زيهم بالحوش مافي شي يوقف حلمي ماشاء الله منذ الصغر. احب العصر اجلس اسمع لموسيقى هاديه واتنفس لمدة ساعه ونص قد ايش هذا الشي مساعدني هذي الفتره بموضوع القلق الحمدلله
٧ المساء
طلعه مفاجأه وبدون تخطيط كنت حابه أكون ضيفة شرف وما اشرب قهوه بعد الدمار الي سويته اليوم بس سبحان الرزاق جاتني قهوه هديه مستحيل أقول لا. ادعي ان شاء الله اقدر انام بعد شرب هذا الكم من القهوه ماشاء الله
١٠ ونص المساء
عندي مشكله مع النوم اخذ وقت طويل عشان انام حتى وانا مجهده ورح اموت من النعاس . جربت تأمل النوم صح استرخي بس ما انام ، جربت ابعد عن الجوال لمدة ساعه عن موعد النوم مافاد .جربت اقراء قبل النوم بعد نفس النتيجة. جربت ما اشرب كافيين وقت المساء مافي فايده. فاقريت معلومه عن الاستحمام بالمويا البارد، انه يساعد على النوم بسبب انخفاض درجة حرارة الجسم بعد المويا البارده يؤدي الى الاسترخاء ويسبب النعاس. نفسي اجرب بس بالمويا الحار بسبب أحاول الطقس عندنا وان شاء الله تضبط معي